پرەمەر-مينيستر ولجاس بەكتەنوۆ Kazakh Tourism باسقارما ءتوراعاسى تالعات عازيزوۆتان ناقتى ناتيجەلەر كۇتەتىنىن مالىمدەدى. بۇل تۋرالى ول ۇكىمەتتىڭ بۇگىنگى وتىرىسىندا ايتتى، دەپ حابارلايدى Dalanews.kz.
پرەمەر-مينيستردىڭ ايتۋىنشا، كومپانيا باسشىسى قىزمەتكە جۋىردا عانا تاعايىندالعانىنا قاراماستان، Kazakh Tourism باسشىلىعىنان ناقتى ناتيجە تالاپ ەتىلەدى.
"تالعات جانات ۇلى، قىزمەتكە ەندى كىرىسكەنىڭىزگە قاراماستان، بىزگە ناقتى ناتيجەلەر قاجەت. ونى سىزدەن كۇتەمىز. ناتيجە بولسا، جۇمىستى جالعاستىرامىز، ال ناتيجە بولماسا، قوشتاسامىز. كەلىستىك پە؟" - دەپ سۇرادى ولجاس بەكتەنوۆ.
ءوز كەزەگىندە Kazakh Tourism باسقارما ءتوراعاسى قويىلعان مىندەتتەردى ورىنداۋعا دايىن ەكەنىن جەتكىزدى.
"كەلىستىك"، - دەپ جاۋاپ بەردى تالعات عازيزوۆ.
بۇدان بولەك، ۇكىمەت باسشىسى بۇگىنگى وتىرىستا ءبىرقاتار تۇيتكىلدى ماسەلەگە توقتالدى:
- كوپتەگەن نىساندا ينتەرنەت ساپاسى ناشار. جۇمىستار ءالى جوسپارلانىپ جاتىر نەمەسە قارقىنى وتە باياۋ.
- بۇقارالىق اقپارات قۇرالدارى مەن الەۋمەتتىك جەلىلەردە سانيتاريا-ەپيدەميولوگيا تالاپتارىن بۇزۋ دەرەگى ءجيى كوتەرىلەدى.
- كوپشىلىككە تانىمال جانە شالعايدا ورنالاسقان تۋريستىك ورىندارعا كولىكپەن جەتۋ ماسەلەسىنە، جول بويىنداعى سەرۆيسكە قاتىستى سۇراقتار بار.
- كەي جەرلەردە ەنەرگيا قۋاتى جەتىسپەيدى.
- تاۋلىك بويى جۇمىس ىستەيتىن مەديسينالىق بەكەتتەردى، قۇقىق قورعاۋ ورگاندارى مەن قۇتقارۋ قىزمەتتەرىن ۇيىمداستىرۋ ءىسى بارلىق جەردە بىردەي شەشىمىن تاپپاي كەلەدى.
- تۋريستىك نىساندارعا جاقىن ءدامحانالار مەن دۇكەندەردە باعا سول كۇيى قىمبات.
- شاشىلىپ جاتقان قوقىستارعا، دەمالىس ورىندارىنا اپاراتىن جولدار مەن كولىك تۇراقتارى جوق بولۋىنا بايلانىستى تۋريستەردەن ءتۇسىپ جاتقان شاعىم كوپ.
