ءانشى روزا رىمبايەۆا مەن دەپۋتات داۋلەت تۇرلىحانوۆتى الداپ كەتكەن كاسىپكەر سوتتالدى، - دەپ حابارلايدى Dalanews.kz Nege.aqsha-عا سىلتەپ.
63 جاستاعى كاسىپكەر سەرىك بەكقايىروۆ اسىل تۇقىمدى جىلقىلار مەن اۆتوموبيلدەردى ساتۋمەن اينالىسقان. كاسىپكەر الاياقتىقتىڭ 4 ەپيزودى بويىنشا 6 جىل، 8 اي مەرزىمگە سوتتالدى. ەكى ەپيزود بويىنشا زارداپ شەككەن - ءانشى روزا رىمبايەۆا مەن دەپۋتات داۋلەت تۇرلىحانوۆ.
قىلمىستىق ءىستىڭ ماتەريالدارىنا سايكەس، 2013 جىلى جازدا بەكقايىروۆ تۇرلىحانوۆقا كەلىپ، اسفالت-بەتون زاۋىتىن سالۋعا 1،2 ميلليون دوللار سۇراعان. كاسىپكەر تۇرلىحانوۆقا زاۋىتتىڭ جارتىسىن بەرەتىنىن ايتقان. دەپۋتات سۇراعان اقشاسىن بەرىپ، كەلىسكەن.
الايدا سوتتا ايىپتالۋشى تۇرلىحانوۆتى 1989 جىلدان بەرى تانيتىنىن، ەكەۋى كورشى بولعانىن، ءبىراق دەپۋتاتتان ەشقانداي اقشا الماعانىن ايتقان. سوتتا كاسىپكەر ءقازىر ەشكىم بىرەۋگە 1،2 ميلليون دوللاردى جايدان جاي بەرە المايتىنىن اتاپ وتكەن.
"تەرگەۋ يزولياتورىندا وتىرعان كەزىمدە ەكى تەرگەۋشى مەن تۇرلىحانوۆتىڭ ادامدارى كەلىپ، 2 ميلليون دوللار تالاپ ەتىپ، قورقىتتى. بۇل ەپيزود بويىنشا ايىپتاۋ ويدان شىعارىلعان. داۋلەت تۇرلىحانوۆتىڭ تاراپىنان قورقىتىپ، ۇركىتۋ ءالى ءجۇرىپ جاتىر"، - دەيدى سوتتا بەكقايىروۆ.
كاسىپكەر روزا رىمبايەۆانى دا الداماعانىن ايتادى. سەرىك بەكقايىروۆتىڭ سوزىنشە، 2017 جىلى رىمبايەۆامەن تانىسىپ، الماتىداعى پاتەرىن 400 مىڭ دوللارعا ساتىپ العان. كاسىپكەر مۇنداي اقشا قولما-قول بولماعاندىقتان انشىمەن ءۇش جىلعا ءبولىپ تولەۋ ءۇشىن نوتاريۋسپەن كەلىسىم جاساعان ەكەن. بۇل ۋاقىت ارالىعىندا كاسىپكەر تەك 205 000 دوللارىن تولەي العان. قالعان سوماسىن تولەي الماعان، سەبەبى 2020 جىلى پاندەميا باستالعان، سالدارىنان كاسىبى توقتاپ قالعان. ءقازىر پاتەردىڭ تاعدىرى نە بولعانى بەلگىسىز. الايدا تەرگەۋ مالىمەتتەرى بويىنشا، بەكقايىروۆ ونى ساتىپ، اقشاسىن جۇمساپ جىبەرگەن.
ايىپ تاعىلعان كاسىپكەر تاعى ەكى ادامدى الداعان. بىرەۋىمەن 2019 جىلى تانىسىپ، 70 مىڭ دوللار بەرسە ەنەرگەتيكا مينيسترلىگى ارقىلى ەلەكترەنەرگياسىن ءتيىمدى باعادا الىپ بەرۋگە ۋادە بەرگەن. ال ءتورتىنشى ەپيزود بويىنشا زارداپ شەككەن ادامنان 75 مىڭ دوللارعا كولىگىن ساتىپ الىپ، اقشاسىن كەيىن بەرەتىنىن ايتقان. بۇل وقيعا 2020 جىلى بولعان. الايدا كاسىپكەر كىناسىن مويىنداماعان.
سوت ايىپتالۋشىنىڭ دالەلدەرىن قابىلداماي، ايىپتاۋ ۇكىمىن شىعارعان. كاسىپكەر تۇرلىحانوۆقا - 533 748 000 تەڭگە، رىمبايەۆاعا 91 181 950 تەڭگە، قالعان ەكى جابىرلەنۋشىگە 31-33 ميلليون تەڭگە وتەۋگە مىندەتتەلدى.
