بيىل تۇركىستان قالاسىنىڭ وبلىس ورتالىعى اتانعانىنا 7 جىل تولىپ وتىر.
جەتى جىل كولەمىندە وڭىرىمىزدە اۋقىمدى شارالار قولعا الىنىپ، تۇركىستاننىڭ جىلناماسىندا جاڭا جانە جارقىن وقيعالار جازىلىپ جاتىر. تاباندى ەڭبەكتىڭ ناتيجەسىندە تۇركىستان قالاسىندا سۋ جاڭا زاماناۋي، ءزاۋلىم عيماراتتار سالىنىپ، كيەلى مەكەننىڭ كەلبەتى كوركەيدى.
وسى ۋاقىتتا تۇركىستان تۇركى الەمىنىڭ رۋحاني استاناسى اتانىپ، پرەزيدەنتتىڭ باستاماسىمەن كونە قالاعا ەرەكشە مارتەبە بەرىلدى. بۇل مارتەبەلەر ءوڭىر ەكونوميكاسىنىڭ دامۋىنا تىڭ سەرپىن بەرىپ، قالانىڭ ماڭىزدىلىعىن ودان سايىن ايعاقتاي ءتۇستى. وڭىردە تۋريزم، اۋىل شارۋاشىلىعى، ينفراقۇرىلىم مەن جولدار، ونەركاسىپ جانە الەۋمەتتىك سالالار قارقىندى دامۋدا.
ەكونوميكانىڭ باستى كورسەتكىشى - جالپى وڭىرلىك ءونىم كولەمى 7 جىلدا 2،6 ەسە ءوسىپ، 4،5 ترلن.تەڭگەگە جەتتى. ونەركاسىپ ءونىم كولەمى 2018 جىلدان 2،7 ەسەگە ارتىپ، 1 214،0 ملرد. تەڭگەنى قۇرادى. ءوسىم نەگىزىنەن مەتاللۋرگيا، تاماق ونەركاسىبى، ماشينا جاساۋ، جيھاز جاساۋ، قۇرىلىس ونەركاسىبى جانە مۇناي ونىمدەرىن وڭدەۋ سالالارى ونىمدەرىنىڭ ارتۋى ەسەبىنەن ورىن الدى.
ءبىرىڭعاي يندۋستريالاندىرۋ كارتاسى اياسىندا 2018-2024 جىلدارى وڭىردە جالپى قۇنى 56 ملرد.تەڭگەگە 37 جوبا ىسكە اسىرىلىپ، 2 500 جاڭا جۇمىس ورنى قۇرىلدى.
ەكونوميكانىڭ ماڭىزدى سالاسىنىڭ ءبىرى اۋىل شارۋاشىلىعىندا ءونىم كولەمى 7 جىلدا 2 ەسە ارتىپ، العاش رەت 1 ترلن.تەڭگەدەن استى. جالپى وندىرىلگەن ءونىم كولەمى بويىنشا رەسپۋبليكادا كوشباستاپ تۇرمىز. اگروونەركاسىپ كەشەنىنە 7 جىلدا جالپى 700 ملرد. تەڭگە ينۆەستيسيا تارتىلدى.
وبلىس ەكونوميكاسىنا تارتىلعان ينۆەستيسيا كولەمى 7 جىلدا 4،2 ەسەگە ارتىپ، 1 335،0 ملرد.تەڭگەنى قۇرادى. بۇل كورسەتكىش 2018 ج. 314،1 ملرد.تەڭگەنى قۇراعان بولاتىن.
جالپى، وبلىسىمىز قىرۋار جەتىستىكتەرگە قول جەتكىزدى. بۇل جەتىستىكتەر ءوڭىرىمىز بىلاي تۇرعاندا، ەلىمىز ءۇشىن ۇلكەن ماڭىزعا يە.
مەملەكەت باسشىسى قاسىم-جومارت توقايەۆ تۇركىستان وبلىسىنا جاساعان جۇمىس ساپارلارىنىڭ بىرىندە تۇركىستاندى اتا جۇرتىمىزدىڭ التىن قازىعى دەپ اتاپ ءوتىپ، ءوز سوزىندە: «قاستەرلى شاھار كونە زاماننان بەرى ۇلتتىڭ ۇياسى، قازاقتىڭ قارا شاڭىراعى بولىپ كەلەدى. تۇركىستان وسى مارتەبەلى مىندەتىن ءقازىر دە ابىرويمەن اتقارىپ وتىر»، - دەگەن بولاتىن.
يا، تۇركىستاننىڭ ورنى قاشان دا ايرىقشا. سوندىقتان، كيەلى تۇركىستاندى تۇلەتۋ – رۋحانياتىمىزدى، تاريحىمىزدى، رۋحىمىزدى تۇلەتۋ بولىپ تابىلادى.
تۇركىستاندا جۇزدەگەن حاندارىمىز بەن بيلەرىمىزدىڭ، باتىرلارىمىز بەن اقىندارىمىزدىڭ، اۋليە-امبيەلەرىمىزدىڭ مازارلارى بار. ءبىر سوزبەن ايتقاندا تۇركىستان تەڭدەسى جوق اڭىز قالا.
تۇركىستاننىڭ وسىپ-وركەندەۋى ءدال بۇگىنگىدەي قارقىنمەن جۇرسە، بولاشاقتا كونە شاھاردىڭ الەمدىك قاۋىمداستىقتا ءوزىنىڭ نىق ورنىن تاۋىپ، كۇللى تۇركى دۇنيەسىنىڭ ابىرويىن اسىراتىنىنا سەنىمدىمىن.
تۇركىستانىمىز جايناپ، تۇرلەنە بەرسىن!
تۇركىستان وبلىستىق ءماسليحاتىنىڭ ءتوراعاسى نۇرالى ءابىشوۆ
