رەسپۋبليكا كۇنىنە وراي وبلىس ورتالىعىندا 100 ءتۇپ اعاش وتىرعىزىلدى. «تازا قازاقستان» جوباسى اياسىندا ۇيىمداستىرىلعان شاراعا تۇركىستان وبلىسىنىڭ اكىمى دارحان ساتىبالدى، زيالى قاۋىم وكىلدەرى، دەپۋتاتتار، تۇركىستان قالالىق وزبەك ەتنو-مادەني بىرلەستىگى، مەملەكەتتىك قىزمەتشىلەر، كوممۋنالدىق سالا وكىلدەرى مەن قالا تۇرعىندارى قاتىستى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
ولار ورتالىق مەشىت اۋلاسىنا، «كەرۋەن ساراي» ماڭىنداعى «ارەنا» الدى مەن تۋريزيم ۋنيۆەرسيتەتىنىڭ جانىنا ساندىك اعاشتار، بوزارشا، قاراعاش، شاعان، ۇيەڭكى، سىندى اعاش تۇرلەرىن ەكتى.
يگى باستاماعا قولداۋ بىلدىرگەن وبلىس اكىمى دارحان ساتىبالدى كوپپەن بىرگە اعاش كوشەتتەرىن ەگىپ، اعاش وتىرعىزۋ – ەكولوگيالىق تازا بولاشاققا جاسالعان ماڭىزدى قادام ەكەنىن اتاپ ءوتتى. ءاربىر تۇرعىن تازالىقتى ءوز اۋلاسىنان باستاپ، قالا اۋماعىن جاسىل جەلەكپەن كومكەرۋگە ۇلەس قوسۋ كەرەكتىگىن جەتكىزدى.
– تاياۋدا پرەزيدەنتىمىز تۇركىستان وڭىرىنە جاساعان ساپارىندا تۇركىستاننىڭ تازا ءارى كورىكتى قالاعا اينالعانىن اتاپ ءوتتى. تۇركىستاندى باقپەن كومكەرىلگەن شاھارعا اينالدىرۋ ءۇشىن جاسىل جەلەك قورىن ۇلعايتۋعا مىندەتتىمىز. ءبىزدىڭ اسەم قالامىز بۇرىنعىدان دا سۇلۋ ءارى جاسىل جەلەككە بولەنۋى ءۇشىن قالالىقتاردى وسى باستامانى قولداۋعا شاقىرامىن، – دەدى وبلىس اكىمى.
ايتا كەتەيىك، وبلىس اكىمىنىڭ تاپسىرماسىنا سايكەس، تۇركىستان وبلىسىنىڭ ەلدى مەكەندەرىن كوگالداندىرۋدىڭ 2022-2024 جىلدارعا ارنالعان ءىس-شارا جوسپارى بەكىتىلدى. جوسپار اياسىندا بۇگىنگى كۇنگە دەيىن 2 ميلليونعا جۋىق كوشەت ەگىلدى. ونىڭ ىشىندە، تۇركىستاندى كوگالداندىرۋدا جۇيەلى جۇمىستار اتقارىلۋدا.
بيىلعى جىلدىڭ سوڭىنا دەيىن وبلىس بويىنشا 500 مىڭنان اسا كوشەت ەگىلەدى دەپ كۇتىلۋدە. قازىرگى تاڭدا وسى باعىتتا جۇمىس ءجۇرىپ جاتىر.
