تۇركىستان وبلىسىنىڭ اكىمى جانسەيىت تۇيمەبايەۆ ارنايى جۇمىس ساپارىمەن تۇركىستان قالاسىندا بولىپ، كوشىپ باراتىن وبلىستىق مەملەكەتتىك مەكەمەلەردىڭ عيماراتتارىن ارالاپ كوردى.

ونداعى دايىندىعىمەن تانىسقان ايماق باسشىسى، كوشۋ شارالارىن شيراتۋدى تاپسىردى.

وبلىس اكىمى ءىسساپارى بارىسىندا نىسانداردا جۇرگىزىلىپ جاتقان جوندەۋ جۇمىستارىمەن ارالاپ كورىپ، جەدەلدەتىپ اياقتاۋ كەرەكتىگىن ايتتى.

– حالىققا ساپالى قىزمەت كورسەتۋ ءۇشىن مەملەكەتتىك مەكەمەلەرگە تيىسىنشە جاعداي جاسالۋ كەرەك. ياعني، قىزمەتكەرلەردىڭ وتىرعان جەرى ىڭعايلى جانە بارلىق قاجەتتى دەگەن تەحنيكالىق جابدىقتارمەن جابدىقتالۋى ءتيىس. بۇل جۇمىستاردى وتە تەزدەتىپ اتقارۋ كەرەك، سەبەبى ساناۋلى كۇندەردەن كەيىن وسىندا جۇمىس ىستەيمىز. مۇندا كەلگەن تۇرعىندارعا ءتيىستى بارلىق جاعداي جاسالۋى كەرەك، – دەدى جانسەيىت قانسەيىت ۇلى.

جالپى تۇركىستان قالاسىنا 1203 شتاتتىق بىرلىگى بار 27 جەرگىلىكتى اتقارۋشى ورگان كوشىرىلەدى. بۇگىندە وبلىستىق باسقارمالاردىڭ باسىم بولىگى كوشىپ بارىپ، جۇمىسقا كىرىسىپ كەتكەن. كەڭسەنى جالعا الۋ، پاتەردى جالعا الۋ، جالاقىعا ۇستەمە، عيمارات جوندەۋگە ۇكىمەت رەزەرۆىنەن ءتيىستى قارجى قارالعان.

قازىرگى تاڭدا 13 اۋماقتىق ورگاننىڭ وكىلدەرى تۇركىستان قالاسىندا حالىققا قىزمەت كورسەتۋدە.

بارلىق مەملەكەتتىك ورگانداردى كوشىرۋ بەكىتىلگەن جوسپارعا سايكەس جۇزەگە اسىرىلۋدا. بۇگىندە مەملەكەتتىك ورگانداردىڭ تولىققاندى جۇمىس ىستەۋى ءۇشىن ءتيىستى كوممۋنيكاسيالىق جانە بايلانىس جۇيەلەرىمەن قامتاماسىز ەتۋ جۇمىستار جۇرگىزىلۋدە.

تۇرعىن ءۇيدى قاجەت ەتەتىن مەملەكەتتىك قىزمەتكەرلەرگە جاتاقحانادان 700-گە جۋىق ورىن ازىرلەنگەن.

ايتا كەتەيىك، بۇدان بىلاي تۇركىستان قالاسىنا كوشىپ بارعان مەملەكەتتىك قىزمەتكەردىڭ ەڭبەك اقىسىنا 20 پايىز قوسىلىپ، جۇمىس كەزەڭى ءۇشىن تولەنەتىن جىل سايىنعى ەڭبەك دەمالىسى كۇنتىزبەلىك 30 كۇنگە قوسىمشا ەكولوگيالىق كۇنتىزبەلىك 7 كۇن مەرزىمىندە ساۋىقتىرۋ دەمالىسى بەرىلەتىن بولادى. سونىمەن قاتار، جىل سايىن ساۋىقتىرۋعا ارنالعان تولەمدەردىڭ ۇستىنە ءبىر ايلىق كورسەتكىش كولەمىندە ماتەريالدىق كومەك بەرىلەدى. وسىلايشا مەمقىزمەتكەر ەڭبەك دەمالىسى كەزىندە جالپى 3 ماتەريالدىق ايلىق اقى الاتىن بولادى.

ال، اكىمشىلىك ماماندارىنىڭ باسپانانى جالداۋ ماسەلەسى رەسپۋبليكالىق بيۋدجەت ەسەبىنەن شەشىمىن تاۋىپ، ءتيىستى قولداۋلار كورسەتىلەدى. سونداي-اق، كەلىسىم شارت نەگىزدە ەڭبەك ەتەتىن بارلىق قىزمەتكەرلەر دە جاتاقحانالارمەن قامتىلادى.



تۇركىستان وبلىسى اكىمىنىڭ باسپا ءسوز قىزمەتى