اكتيۆ جينالىسىن اشىپ بەرىپ، جۇرگىزىپ وتىرعان وبلىس اكىمى جانسەيىت تۇيمەبايەۆ نەگىزگى التى باعىتتان تۇراتىن ساياسي قۇجاتتىڭ ءمانى مەن ماعىناسىنا جەكە-جەكە توقتالىپ، ونىڭ قازاقستاندىقتاردىڭ تابىسىن ارتتىرۋعا، الەۋمەتتىك جاعدايىن جاقسارتۋعا، ورتا جانە شاعىن كاسىپكەرلىكتى ودان ءارى دامىتۋعا، حالىقتىڭ ءومىر سۇرۋىنە قولايلى، ءارى ءقاۋىپسىز قوعامدىق ورتا قۇرۋعا باعىتتالعانىن جەتكىزدى. ەل پرەزيدەنتىنىڭ جولداۋىنداعى ءاربىر تارماقتى تالقىلاعان ايماق باسشىسى ونداعى مىندەتتەردى تۇركىستان وبلىسىندا اتقارىلىپ جاتقان جۇمىستارمەن بايلانىستىرا باياندادى.
«ەلباسى «بيزنەستىڭ جول كارتاسى – 2020» باعدارلاماسىنىڭ مەرزىمىن 2025 جىلعا دەيىن ۇزارتۋدى جۇكتەي وتىرىپ، ونىڭ بولجامدى ناتيجەلەرىن دە اتاپ ءوتتى. «باعدارلامانى جۇزەگە اسىرۋ ءۇشىن جىل سايىن قوسىمشا كەمىندە 30 ميلليارد تەڭگە ءبولۋدى قاراستىرۋ قاجەت. بۇل 3 جىل ىشىندە قوسىمشا كەمىندە 22 مىڭ جاڭا جۇمىس ورنىن اشۋعا، 224 ميلليارد تەڭگە سالىق تۇسىرۋگە جانە 3 تريلليون تەڭگەنىڭ ءونىمىن وندىرۋگە مۇمكىندىك بەرەدى» دەدى پرەزيدەنتىمىز. بۇل تاپسىرما دا جاڭادان قۇرىلعان تۇركىستان وبلىسىندا دا كاسىپكەرلىك سالاسىنىڭ ودان ءارى دامۋىنا تىڭ جول اشادى»، – دەدى ج.تۇيمەبايەۆ.
وتىرىستا، سونىمەن بىرگە، وبلىس اكىمى جولداۋدا ايتىلعانداي، ەل ەكونوميكاسىن العا سۇيرەيتىن، اتاپ ايتقاندا، يندۋستريالاندىرۋ، ونەركاسىپ، قۇرىلىس، تۇرعىن ءۇي، تۋريزم، اگروونەركاسىپ سىندى سالالاردىڭ وڭىردەگى كورسەتكىشىمەن، الداعى دامۋ جوسپارلارىمەن ءبولىستى.
مەملەكەت باسشىسىنىڭ ساياسي قۇجاتىنداعى مىندەتتەردى ناسيحاتتاۋدا مىنبەرگە ءبىرقاتار ازاماتتار شىعىپ، ءوز ويلارىن ورتاعا سالدى. ولاردىڭ ىشىندە، ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ دوسەنتى، تاريح عىلىمدارىنىڭ دوكتورى تۇرسىن ماحان ۇلى، «بورتە ميلكا» كاسىپورنىنىڭ قۇرىلتايشىسى، وبلىستىق ءماسليحات دەپۋتاتى نۇرالى ابىشيەۆ، سايرام اۋداندىق قوعامدىق كەڭەس ءتوراعاسى، ارداگەر ۇستاز امانگەلدى قابىلبەكوۆ، قازاقستان وزبەكتەرى «دۋستليك» قاۋىمداستىعىنىڭ ءتوراعاسى يكرام حاشيمجانوۆ جانە ق.ا.ياساۋي اتىنداعى حالىقارالىق قازاق-تۇرىك ۋنيۆەرسيتەتىنىڭ 4ء-ى كۋرس ستۋدەنتى، «تۇركىستان ستۋدەنتتەرى اليانسى» قوعامدىق بىرلەستىگىنىڭ مۇشەسى الۋا تۇرسىنحان دا بار.
اكتيۆ سوڭىندا ج.تۇيمەبايەۆ ەلباسى جولداۋىندا اتاپ كورسەتىلگەن ماسەلەلەردى نەگىزگە الا وتىرىپ، ەڭ الدىمەن، ونىڭ ءتيىستى دەڭگەيدە ءتۇسىندىرىلىپ، باق-تا ناسيحاتتالۋىن وبلىستىق ىشكى ساياسات باسقارماسىنا تاپسىردى. ناسيحاتتاۋ شارالارى، سونداي-اق، وبلىستىق ءبىلىم، وتباسى، بالالار جانە جاستار ىستەرى جونىندەگى باسقارمالارى مەن اۋدان، قالا اكىمدىكتەرىنە، سونداي-اق، «نۇر وتان» پارتياسى وبلىستىق فيليالىنا دا جۇكتەلدى.
وبلىستىق ەكونوميكا جانە بيۋدجەتتىك جوسپارلاۋ باسقارماسىنا بيۋدجەتتىك مەكەمەلەردە جۇمىس ىستەيتىن قىزمەتكەرلەردىڭ ەڭبەكاقىسىن قايتا ەسەپتەپ، قاجەتتى قارجىنى انىقتاۋ شارالارىن جۇرگىزۋدى جۇكتەپ، جەرگىلىكتى بيۋدجەت ەسەبىنەن ءبىلىم، دەنساۋلىق ساقتاۋ، ىشكى ىستەر جانە باسقا دا سالا ماماندارى ءۇشىن جەڭىلدەتىلگەن يپوتەكا بويىنشا العاشقى جارنانى ءىشىنارا سۋبسيديالاۋ ماسەلەسىن شەشۋ جولدارىن قاراستىرىپ، ناقتى ۇسىنىس ەنگىزۋدى تاپسىرسا، وبلىستىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنا «بيزنەستىڭ جول كارتاسى» باعدارلاماسىنىڭ قولدانۋ مەرىزىمىنىڭ 2025 جىلعا دەيىن ۇزارۋىنا وراي، ءتيىستى شارالاردى جۇزەگە اسىرۋدى مىندەتتەدى. وبلىستىق اۋىل شارۋاشىلىق باسقارماسى ەڭبەك ونىمدىلىگىن جانە قايتا وڭدەلگەن اۋىل شارۋاشىلىق ءونىمىنىڭ ەكسپورتىن كوبەيتۋ بويىنشا ناقتى شارالاردى جۇزەگە اسىراتىن بولسا، ءبىلىم باسقارماسى مەكتەپكە دەيىنگى ءبىلىم بەرۋ ساپاسىن تۇبەگەيلى جاقسارتۋ ماقساتىندا ءتيىستى مينيسترلىكپەن جول كارتاسىن ازىرلەۋدى مىندەتىنە الدى. ال دەنساۋلىق ساقتاۋ باسقارماسى بۇدان كەيىن مەديسينالىق قىزمەت كورسەتۋ مەكەمەلەرىنىڭ تولىققاندى ەلەكتروندى قۇجات اينالىمى جۇيەسىنە ءوتۋدى قامتاماسىز ەتپەك. وبلىستىق دەنە شىنىقتىرۋ جانە سپورت باسقارماسى مەن اۋدان، قالا اكىمدىكتەرىمەن بىرلەسىپ تۇرعىنداردىڭ بۇقارالىق سپورت پەن دەنە شىنىقتىرۋدىڭ قول جەتىمدىلىگىن ارتتىرۋ ماقساتىندا ارنايى سپورت كەشەندەرىن سالۋ جانە اۋلا مەن ساياباقتاردى ارنايى دەنە شىنىقتىرۋ قۇرالدارىمەن جابدىقتاۋ جولدارىن جۇزەگە اسىراتىن بولدى. جالپى، وبلىستىق باسقارمالار مەن قالا، اۋدان اكىمدىكتەرى سىبايلاس جەمقورلىقپەن بەلسەندى كۇرەس جۇمىستارىن جالعاستىرىپ، بۇل ماقساتتا كورسەتىلەتىن مەملەكەتتىك قىزمەتتەر اياسىن مەيلىنشە تىكەلەي قارىم-قاتىناستى ازايتۋ ارقىلى ەلەكتروندى فورماتقا كوشۋ شارالارىن جۇزەگە اسىرماق.
تۇركىستان وبلىسى اكىمىنىڭ باسپا ءسوز قىزمەتى
