Túrkistandyqtar Joldaýdy talqylap, jańa mindetterdi júzege asyrýǵa kiristi
Túrkistan oblysynda QR Prezidenti N.Á.Nazarbaevtyń Qazaqstan halqyna arnaǵan «Qazaqstandyqtardyń ál-aýqatynyń ósýi: tabys pen turmys sapasyn arttyrý» atty Joldaýy boiynsha májilis ótti.
Aktiv jinalysyn ashyp berip, júrgizip otyrǵan oblys ákimi Janseiit Túimebaev negizgi alty baǵyttan turatyn saiasi qujattyń máni men maǵynasyna jeke-jeke toqtalyp, onyń qazaqstandyqtardyń tabysyn arttyrýǵa, áleýmettik jaǵdaiyn jaqsartýǵa, orta jáne shaǵyn kásipkerlikti odan ári damytýǵa, halyqtyń ómir súrýine qolaily, ári qaýipsiz qoǵamdyq orta qurýǵa baǵyttalǵanyn jetkizdi. El Prezidentiniń Joldaýyndaǵy árbir tarmaqty talqylaǵan aimaq basshysy ondaǵy mindetterdi Túrkistan oblysynda atqarylyp jatqan jumystarmen bailanystyra baiandady.
«Elbasy «Biznestiń jol kartasy – 2020» baǵdarlamasynyń merzimin 2025 jylǵa deiin uzartýdy júktei otyryp, onyń boljamdy nátijelerin de atap ótti. «Baǵdarlamany júzege asyrý úshin jyl saiyn qosymsha keminde 30 milliard teńge bólýdi qarastyrý qajet. Bul 3 jyl ishinde qosymsha keminde 22 myń jańa jumys ornyn ashýǵa, 224 milliard teńge salyq túsirýge jáne 3 trillion teńgeniń ónimin óndirýge múmkindik beredi» dedi Prezidentimiz. Bul tapsyrma da jańadan qurylǵan Túrkistan oblysynda da kásipkerlik salasynyń odan ári damýyna tyń jol ashady», – dedi J.Túimebaev.
Otyrysta, sonymen birge, oblys ákimi Joldaýda aitylǵandai, el ekonomikasyn alǵa súireitin, atap aitqanda, indýstriialandyrý, ónerkásip, qurylys, turǵyn úi, týrizm, agroónerkásip syndy salalardyń óńirdegi kórsetkishimen, aldaǵy damý josparlarymen bólisti.
Memleket basshysynyń saiasi qujatyndaǵy mindetterdi nasihattaýda minberge birqatar azamattar shyǵyp, óz oilaryn ortaǵa saldy. Olardyń ishinde, Q.A.Iasaýi atyndaǵy Halyqaralyq Qazaq-Túrik ýniversitetiniń dotsenti, tarih ǵylymdarynyń doktory Tursyn Mahanuly, «Bórte Milka» kásipornynyń quryltaishysy, oblystyq máslihat depýtaty Nuraly Ábishev, Sairam aýdandyq qoǵamdyq keńes tóraǵasy, ardager ustaz Amangeldi Qabylbekov, Qazaqstan ózbekteri «Dýstlik» qaýymdastyǵynyń tóraǵasy Ikram Hashimjanov jáne Q.A.Iasaýi atyndaǵy Halyqaralyq Qazaq-Túrik ýniversitetiniń 4-i kýrs stýdenti, «Túrkistan stýdentteri aliansy» qoǵamdyq birlestiginiń múshesi Alýa Tursynhan da bar.
Aktiv sońynda J.Túimebaev Elbasy Joldaýynda atap kórsetilgen máselelerdi negizge ala otyryp, eń aldymen, onyń tiisti deńgeide túsindirilip, BAQ-ta nasihattalýyn oblystyq ishki saiasat basqarmasyna tapsyrdy. Nasihattaý sharalary, sondai-aq, oblystyq bilim, otbasy, balalar jáne jastar isteri jónindegi basqarmalary men aýdan, qala ákimdikterine, sondai-aq, «Nur Otan» partiiasy oblystyq filialyna da júkteldi.
Oblystyq ekonomika jáne biýdjettik josparlaý basqarmasyna biýdjettik mekemelerde jumys isteitin qyzmetkerlerdiń eńbekaqysyn qaita eseptep, qajetti qarjyny anyqtaý sharalaryn júrgizýdi júktep, jergilikti biýdjet esebinen bilim, densaýlyq saqtaý, ishki ister jáne basqa da sala mamandary úshin jeńildetilgen ipoteka boiynsha alǵashqy jarnany ishinara sýbsidiialaý máselesin sheshý joldaryn qarastyryp, naqty usynys engizýdi tapsyrsa, oblystyq kásipkerlik jáne indýstrialdy-innovatsiialyq damý basqarmasyna «Biznestiń jol kartasy» baǵdarlamasynyń qoldaný meriziminiń 2025 jylǵa deiin uzarýyna orai, tiisti sharalardy júzege asyrýdy mindettedi. Oblystyq aýyl sharýashylyq basqarmasy eńbek ónimdiligin jáne qaita óńdelgen aýyl sharýashylyq óniminiń eksportyn kóbeitý boiynsha naqty sharalardy júzege asyratyn bolsa, bilim basqarmasy mektepke deiingi bilim berý sapasyn túbegeili jaqsartý maqsatynda tiisti ministrlikpen jol kartasyn ázirleýdi mindetine aldy. Al densaýlyq saqtaý basqarmasy budan keiin meditsinalyq qyzmet kórsetý mekemeleriniń tolyqqandy elektrondy qujat ainalymy júiesine ótýdi qamtamasyz etpek. Oblystyq dene shynyqtyrý jáne sport basqarmasy men aýdan, qala ákimdikterimen birlesip turǵyndardyń buqaralyq sport pen dene shynyqtyrýdyń qol jetimdiligin arttyrý maqsatynda arnaiy sport keshenderin salý jáne aýla men saiabaqtardy arnaiy dene shynyqtyrý quraldarymen jabdyqtaý joldaryn júzege asyratyn boldy. Jalpy, oblystyq basqarmalar men qala, aýdan ákimdikteri sybailas jemqorlyqpen belsendi kúres jumystaryn jalǵastyryp, bul maqsatta kórsetiletin memlekettik qyzmetter aiasyn meilinshe tikelei qarym-qatynasty azaitý arqyly elektrondy formatqa kóshý sharalaryn júzege asyrmaq.
Túrkistan oblysy ákiminiń baspasóz qyzmeti
