ايماق باسشىسى الدىمەن "ياسسى نان" جشس-نە تابان تٸرەدٸ. 2014 جىلى ٸسكە قوسىلعان جوبانىڭ جالپى قۇنى 200 ملن. تەڭگە. تەۋلٸگٸنە 13,7 توننا ٶنٸم شىعاراتىن نان زاۋىتىندا 100 ادام تۇراقتى جۇمىسپەن قامتىلعان. كەسٸپورىن باسشىسى ناسيبا اتاەۆا اس اتاسىنا دەگەن سۇرانىستىڭ ارتۋىنا بايلانىستى ٶنٸم كٶلەمٸن دە كٶبەيتۋگە بەل بايلاعانىن ايتادى.
"بۇل ناۋبايحانا باستاپقىدا بەلگٸلٸ بٸر كەسٸپورىن جۇمىسشىلارىن نان ٶنٸمٸمەن قامتاماسىز ەتۋ ٷشٸن قۇرىلعان. ۋاقىت ٶتە كەلە قالا تۇرعىندارىنان بٸزدٸڭ ٶنٸمگە دەگەن سۇرانىس كٷرت ارتتى. نەتيجەسٸندە ٶنٸم كٶلەمٸن تەۋلٸگٸنە 30 مىڭ دانادان 50 مىڭعا شىعارىپ وتىرمىز. وسىعان وراي جاڭا جۇمىس ورىندارى اشىلىپ, ناۋبايحانامىزدىڭ ٶندٸرٸستٸك قۋاتى مەن اۋماعى مەيلٸنشە ۇلعايدى. قازٸرگٸ تاڭدا مۇندا ناننىڭ 40 تٷرٸ, شۇجىق ٶنٸمٸنٸڭ 15 تٷرٸ شىعارىلادى", – دەدٸ ناسيبا سابىرقىزى.
بٷگٸندە كەسٸپكەر ٶز ەسەبٸنەن جوباعا قوسىمشا 800 ملن. تەڭگە قارجى قۇيىپ, چەح رەسپۋبليكاسىنان نان جابۋعا ارنالعان زاماناۋي قوندىرعىلار ساتىپ العان. قازٸرگٸ تاڭدا مەكەمە تٷركٸسان قالاسىن نان ٶنٸمدەرٸمەن تولىق قامتاماسىز ەتٸپ, باعا تۇراقتىلىعىن ساقتاپ وتىر.
سونداي-اق, ايماق باسشىسى قۇرىلىس زاتتارىن شىعارۋمەن اينالىساتىن "ياسسى قۇرىلىس" جاۋاپكەرشٸلٸگٸ شەكتەۋلٸ سەرٸكتەستٸگٸنە دە ايالدادى. وبلىس ەكٸمٸ زاۋىت جۇمىسشىلارىمەن كەزدەسٸپ, وتاندىق كەسٸپورىننىڭ ٶنٸم شىعارۋ ەلەۋەتٸمەن كەڭٸنەن تانىستى.
"ياسسى قۇرىلىس" 2012 جىلى قۇرىلعان. قازٸرگٸ تاڭدا ٶندٸرٸس ورنىندا 120 ادام جۇمىس ٸستەيدٸ.
زاۋىت جىلىنا 138 000 توننا تەمٸر بەتون بۇيىمدارىن شىعارىپ, ٸشكٸ نارىقتى وتاندىق قۇرىلىس زاتتارىمەن قامتاماسىز ەتٸپ وتىر.
فوتو: سامات مىرزاليەۆ
