كاسىپوداقتار قاۋىمداستىعىنىڭ ءتوراعاسى، قۇرىلتاي مۇشەسى ساتىبالدى داۋلەتاليننىڭ ايتۋىنشا توقايەۆتىڭ تۇسىندا تولىق وزگەرىپ، جاڭادان جاساقتالاتىن مەماپپارات قوعاممەن قويىن-قولتىق جۇمىس ىستەپ ۇيرەنۋى قاجەت.
حالىقپەن شىنايى پىكىرلەسىپ، كەمشىلىگى بولسا جاسىرمايتىن، ارتىقشىلىعىن اسىرىپ ايتپايتىن شەنەۋنىكتەردىڭ شوعىرىن قالىپتاستىرعان ماڭىزدى.
ءسوي دەگەن داۋلەتالين:
«وتكەن جىلدارى مەملەكەت پەن قوعام اراسىنداعى ءوزارا ءىس-قيمىل الەۋەتىنىڭ ىسكە اسىرىلماۋى ازاماتتار ءۇشىن دە، بيلىك ءۇشىن دە بەلگىلى ءبىر پروبلەمالار تۋعىزعانى انىق.
بۇگىندە بيلىك يكەمدى بولۋعا، قوعامدا بولىپ جاتقان ۇدەرىستەرگە جەدەل دەن قويۋعا، سول ارقىلى ەندى ازاماتتىق قوعامعا قارسى شىقپاي، ونىمەن ۇيلەسىمدى بولۋعا تىرىسۋدا. قۇندىلىقتار «مەملەكەت ادام ءۇشىن» دەيتىن اسا ماڭىزدى قاعيدانىڭ پايداسىنا وزگەرۋدە»، - دەپ اتاپ ءوتتى.
ونىڭ ايتۋىنشا، مەملەكەتتىك باسقارۋ ماسەلەسى بيلىك پەن ازاماتتاردىڭ ارىپتەستىك ماسەلەسىنە اينالىپ بارادى.
«قوعامدى ءبىر جۇدىرىققا جۇمىلدىرۋ اناۋ ايتقانداي وڭاي شارۋا ەمەس. قاڭتار وقيعاسىنان كەيىن پرەزيدەنت توقايەۆتىڭ الدىندا مەملەكەتتىلىكتى نىعايتۋ مىندەتى تۇر. تۇركىستاندا وتەتىن كەلەسى قۇرىلتايدا وسى ماسەلەنى جان-جاقتى تالقىلاۋعا ءتيىسپىز.
ال ازاماتتىق قوعام اياعىنان تۇرىپ، تولىق قالىپتاسپايىنشا ادىلەتتى قازاقستاندى قۇرۋ مۇمكىن ەمەس. قوعام بەلسەندى بولعان جەردە بيلىك ءاربىر شەشىمگە جاۋاپپەن قارايتىن بولادى.
بۇل باعىتتاعى باستى قادامداردىڭ ءبىرى – حالىق پەن بيلىك اراسىنداعى كەرى بايلانىستى قامتاماسىز ەتەتىن ورگان رەتىندە ۇلتتىق قۇرىلتايدىڭ قۇرىلۋى ەكەنى ءسوزسىز.
ۇلتتىق قۇرىلتايدىڭ قۇرىلۋى «بيلىك – قوعام – ازامات» پاراديگماسىنداعى قارىم-قاتىناستاردى ساپالى، جاڭا دەڭگەيگە كوتەرۋ، ولاردى ءتيىمدى جانە ناتيجەلى ەتۋ مىندەتىن قويىپ وتىر»، – دەيدى ساراپشى.
داۋلەتالين پايىمداۋىنشا حالىق پرەزيدەنت توقايەۆتىڭ كونسەپسياسىنىڭ توڭىرەگىنە توپتاسۋعا ءازىر. «ەستيتىن ۇكىمەت»، «ادىلەتتى قازاقستان» سەكىلدى ۇستانىمدار ەلدىڭ كوڭىلىن شىعىپ، حالىقتىڭ كوكەيىندەگى تىلەكتى تاپ باسقان.
«ەڭ ماڭىزدى الەۋمەتتىك-ساياسي ماسەلەلەردى شەشۋدە قوعامنىڭ كەلىسىمى بولماعان جاعدايدا مەملەكەت پەن ازاماتتىق قوعامنىڭ كۇشتەرىن بىرىكتىرۋ مۇمكىن ەمەس، تۇتاستاي العاندا مەملەكەتتىڭ پروگرەسسيۆتى جانە قارقىندى دامۋى مۇمكىن ەمەس»، – دەپ دەيدى كاسىپوداقتار قاۋىمداستىعىنىڭ ءتوراعاسى.
DALANEWS انىقتاماسى:
پرەزيدەنت قاسىم-جومارت توقايەۆ باسقاراتىن بۇل ورگان ازاماتتىق قوعامنىڭ وزەكتى ماسەلەلەرىن شەشۋگە ارنالعان.
ونىڭ مۇشەلەرىنىڭ قاتارىندا ساياسي جانە قوعام قايراتكەرلەرى، ەلىمىزدىڭ بارلىق وڭىرلەرىنىڭ بەلسەندىلەرى، سونىڭ ىشىندە ەتنيكالىق جانە ءدىني ازشىلىق وكىلدەرى، كاسىپكەرلەر، مادەنيەت قايراتكەرلەرى، ساياساتكەرلەر، زاڭگەرلەر جانە باسقا دا كوپتەگەن ادامدار بار.
بۇلاردىڭ بارلىعى قۇرىلتايعا كەلىسىم بويىنشا قاتىسىپ وتىر، ءبىرىن-بىرى الماستىرادى. ۇيىمدا تەك ءتورت ادام وزگەرىسسىز قالادى. قۇرىلتايدىڭ ءتوراعاسى – رەسپۋبليكا پرەزيدەنتى قاسىم-جومارت توقايەۆ. ونىڭ ەكى ورىنباسارى بار.
ءبىرىنشى ورىنباسارى ەكس- پرەزيدەنتتىڭ كومەكشىسى جانە ەكس-مەملەكەتتىك حاتشى ق ر مەملەكەتتىك كەڭەسشىسى بولىپ تاعايىندالعان ەرلان قارين. مەملەكەتتىك كەڭەسشىنىڭ جاڭا لاۋازىمىندا ول پرەزيدەنتكە تولىق ەسەپ بەرەدى جانە باقىلايدى، ونىڭ مۇددەلەرىن بىلدىرەدى جانە پرەزيدەنت ءۇشىن ىشكى ساياسات سالاسىنداعى ستراتەگيالىق ۇسىنىستاردى تۇجىرىمدايدى.
ەكىنشى ورىنباسارى - بيبىگۇل جەكسەنباي، "باس رەداكتورلار كلۋبى" رەسپۋبليكالىق قوعامدىق بىرلەستىگىنىڭ پرەزيدەنتى، ەلىمىزگە بىلگىلى جۋرناليست.
2016 جىلدان باستاپ ول توقايەۆ پرەزيدەنت بولعانعا دەيىن جانە قازاقستان پارلامەنتى سەناتىنىڭ (جوعارعى پالاتاسىنىڭ) ءتوراعاسى قىزمەتىن اتقارعانعا دەيىن كەمەل ۇلىنىڭ قوعاممەن بايلانىس جونىندەگى كەڭەسشىسى قىزمەتىن اتقاردى.
