ەلىمىزدە 9 شىلدە – سۋ شارۋاشىلىعى قىزمەتكەرلەرى كۇنى، ال 10 شىلدە ۆەتەريناريالىق قىزمەتكەرلەرى كۇنى بولىپ بەكىتىلگەن. وسىعان وراي تۇركىستان وبلىسىندا قوس كاسىبي مەرەكەگە ارنالعان ءىس-شارا ءوتىپ، ەڭبەك ادامدارىنا قۇرمەت كورسەتىلدى. الدىمەن وبلىس اكىمى نۇرالحان كوشەروۆ ۆەتەريناريا سالاسىنىڭ وكىلدەرىنە زامان تالابىنا ساي جابدىقتالعان جاڭا تەحنيكالاردىڭ كىلتىن تاپسىرىپ، جۇمىستارىنا ساتتىلىك تىلەدى. جالپى، بيىل 85 كولىك تابىستالىپ وتىر،- دەپ حابارلايدى Dalanews.kz
ودان كەيىن وبلىس اكىمى سالتاناتتى جيىنعا قاتىسىپ، سالا ماماندارىن قۇتتىقتادى.
– قۇرمەتتى سۋ شارۋاشىلىعى جانە ۆەتەريناريا سالاسىنىڭ قىزمەتكەرلەرى! ارداقتى ەڭبەك ارداگەرلەرى! سىزدەردى كاسىبي مەرەكەلەرىڭىزبەن شىن جۇرەكتەن قۇتتىقتايمىن! مەملەكەت باسشىسى قاسىم-جومارت كەمەل ۇلىنىڭ باستاماسىمەن 2025 جىل «جۇمىسشى ماماندىقتار جىلى» دەپ جاريالاندى. سىزدەر سەكىلدى ەڭبەك ادامدارىنىڭ بەدەلىن ارتتىرۋ، قوعامعا ۇلگى ەتۋ – داستۇرگە اينالىپ جاتىر. بۇگىنگى باسقوسۋىمىز دا – وسىنىڭ دالەلى. تۇركىستان ءوڭىرى – اگروونەركاسىپتىك كەشەن بويىنشا رەسپۋبليكادا كوشباسشى ولكە. ەلىمىزدەگى جالپى ءونىم كولەمىنىڭ 13 پايىزى ءبىزدىڭ وبلىسقا تيەسىلى. جىلىنا 1 ترلن تەڭگەدەن استام قارجىنىڭ ءونىمى وندىرىلەدى. سۋ تاپشىلىعىنىڭ الدىن الۋ باعىتىندا ءبىرقاتار اۋقىمدى جۇمىستار جۇرگىزىلۋدە. بيىل 46 مىڭ گەكتارعا سۋ ۇنەمدەۋ تەحنولوگيالارى ەنگىزىلدى. ناتيجەسىندە اعىن سۋدى 1،5-2 ەسەگە ۇنەمدەۋمەن قاتار، ونىمدىلىكتى 2،5-3 ەسەگە ارتتىرۋعا قول جەتكىزىلۋدە. بۇل رەتتە سۋ شارۋاشىلىعى ماماندارىنىڭ ەڭبەگى ايرىقشا. ال ۆەتەريناريا سالاسىنا كەلسەك، ىندەتتەردىڭ الدىن الۋ، اۋىل شارۋاشىلىعى ونىمدەرىنىڭ ساپاسىن ارتتىرۋ باعىتىندا ىلكىمدى ىستەر اتقارىلۋدا. «ۆەتەريناريا ادامزاتتى ەمدەيدى» دەگەن قاناتتى ءسوز ەشقاشان وزەكتىلىگىن جوعالتقان ەمەس. سەبەبى سالا قىزمەتكەرلەرىنىڭ قاجىرلى ەڭبەگىنىڭ ارقاسىندا ىندەتتەردىڭ الدىن الۋ، اۋىل شارۋاشىلىعى ونىمدەرىنىڭ ساپاسىن ارتتىرۋ باعىتىندا جۇيەلى جۇمىستار جۇرگىزىلۋدە. ءقاۋىپتى ىندەتتەر مەن زيانكەستەرگە قارسى كۇرەس بارىسىنداعى بەلسەندى قىزمەتتەرىڭىزگە العىس بىلدىرەمىن. ءتول مەرەكەلەرىڭىزبەن تاعى دا قۇتتىقتاي كەلە، زور دەنساۋلىق، ەڭبەكتە تابىس، ەل يگىلىگى جولىنداعى قىزمەتتەرىڭىزگە ساتتىلىك تىلەيمىن! – دەگەن نۇرالحان كوشەروۆ ۇزدىك سۋ ماماندارى مەن ۆەتەريناريا وكىلدەرىنە ماراپاتتاردى تابىستادى.
ءىس-شارادا كاسىبي مەرەكە يەلەرى ق ر پرەزيدەنتىنىڭ ءىىى دارەجەلى «ەڭبەك داڭقى» وردەنى، «ەرەن ەڭبەگى ءۇشىن» توسبەلگىسى، ق ر اۋىل شارۋاشىلىعى مينيسترلىگىنىڭ «ەڭبەك ارداگەرى» مەدالى، «اۋىل شارۋاشىلىعىنىڭ ۇزدىگى» توسبەلگىسى، ق ر اۋىل شارۋاشىلىعى مينيسترلىگىنىڭ «قۇرمەت گراموتاسى»، ق ر سۋ رەسۋرستارى جانە يرريگاسيا مينيسترلىگىنىڭ «قۇرمەت گراموتاسى»، تۇركىستان وبلىسى اكىمدىگى جانە وبلىستىق ءماسليحاتىنىڭ «قۇرمەت گراموتاسى»، گراموتاسىنا جانە العىس حاتتارىنا، سونداي-اق وزگە دە ماراپاتتارعا يە بولدى. سالتاناتتى جيىن كونسەرتتىك باعدارلاماعا ۇلاستى.
ايتا كەتەيىك، تۇركىستان وبلىسىندا سۋ شارۋاشىلىعى سالاسىندا اۋقىمدى جۇمىستار اتقارىلۋدا. وڭىردە سۋ ۇنەمدەۋ تەحنولوگيالارى كەڭىنەن ەنگىزىلىپ جاتىر. كوكتەمگى تاسقىن سۋلاردى ۇستاپ، سۋارۋ ماۋسىمىنا ءتيىمدى پايدالانۋ ءۇشىن «بايدىبەك اتا» جانە «بورالداي» سۋ قويمالارى سالىنۋدا. سۋ نىساندارىن «يسلام دامۋ بانكى» قارجىسىن تارتۋ ەسەبىنەن قالپىنا كەلتىرۋ جوسپارلانىپ وتىر. جالپى 25 سۋ قويما، 1 سۋ رەتتەگىش، 269 كانالدى كۇردەلى جوندەۋدەن وتكىزۋ ارقىلى سۋ نىساندارىنىڭ توزۋ كورسەتكىشىن 76%-دان 50%-عا تومەندەتۋ كوزدەلۋدە.
