ءىس-شاراعا تۇركىستان وبلىسى اكىمىنىڭ ورىنباسارى بەيسەن تاجىبايەۆ، ق.ا.ياساۋي اتىنداعى حقتۋ رەكتورى جانار تەمىربەكوۆا، ۋنيۆەرسيتەتتىڭ وكىلەتتى كەڭەس ءتوراعاسى مۋحيتتين شيمشەك جانە وبلىستىڭ زيالى قاۋىم وكىلدەرى، اتالعان وقۋ وردانىڭ ۇجىمى مەن ستۋدەنتتەرى قاتىستى.
– باۋىرلاس تۇرىك حالقىن تاريحىنداعى ايتۋلى وقيعا – تۇركيا رەسپۋبليكاسىنڭ 100 جىلدىعىمەن شىن جۇرەكتەن قۇتتىقتايمىن. 1923 جىلى 29 قازاندا تۇركيا رەسپۋبليكاسى جاريالاندى. تاريحشىلار بۇل كۇندى تۇركيانىڭ تاۋەلسىزدىك پەن ۇلتتىق جاڭعىرۋ كەزەڭى باستالعان ءسات دەپ باعالايدى.
تاۋەلسىزدىگىمىزدى تۇڭعىش تانىعاندار قاتارىنداعى تۇركيا – ەلىمىزگە ەڭ كوپ ينۆەستيسيا سالعان سەنىمدى ستراتەگيالىق سەرىكتەسىمىزدىڭ ءبىرى. قازاقستان رەسپۋبليكاسى تاۋەلسىزدىك العان ساتتەن باستاپ قازاقستان مەن تۇركيا پرەزيدەنتتەرى ىنتىماقتاستىق پەن دوستاستىقتىڭ تاماشا ۇلگىسىن كورسەتىپ كەلەدى.
تۇركيا رەسپۋبليكاسىنا ءبىزدىڭ حالقىمىزدىڭ قۇرمەتى ەرەكشە. ونىڭ ءبىر مىسالى وسى وقۋ ورنىنداعى ءوزارا سەنىممەن قۇرىلعان بايلانىس.
قوجا احمەت ياساۋي ۋنيۆەرسيتەتى – تەك ءبىلىم بەرىپ، مادەنيەتتى دامىتاتىن ورتا ەمەس، حالىقتارىمىزدىڭ تاريحي بايلانىسىن قايتا جاڭعىرتقان ورتالىققا اينالدى.
ۋنيۆەرسيتەت تۇلەكتەرى ءقازىر تەك قازاقستاننىڭ دامۋىنا عانا ەمەس، قازاق-تۇرىك باۋىرلاستىعىنىڭ جانە تۇركى الەمىنىڭ دامۋىنا ايتارلىقتاي قىزمەت ەتىپ كەلە جاتىر. جۋىردا تۇركى مەملەكەتتەرى ۇيىمىنىڭ تۋريزم سالاسىنىڭ باسشىلارى تۇركىستاندا جيىن وتكىزدى.
تۇركىستانعا 2024 جىلعى تۋريستىك استانا مارتەبەسى بەرىلدى. قاسيەتتى شاقارىمىزدىڭ رۋحاني سالاسى مەن ءتۋريزمىن دامىتۋعا وسىنداعى جالىندى جاستار دا ۇلەس قوسادى دەپ سەنەمىن. مەن ءوزىم كەزدەسكەن ءاربىر تۇركيالىق باۋىرىمىزدىڭ بويىنان دا ءبىزدىڭ ەلگە دەگەن ەرەكشە قۇرمەتتى بايقايمىن. سەبەبى، ءبىزدىڭ رۋحىمىز ءبىر، ءتۇبىمىز ءبىر، تاريحىمىز ءبىر. بۇل مەرەكە بارشامىزعا ورتاق! – دەدى وبلىس اكىمىنىڭ ورىنباسارى بەيسەن تاجىبايەۆ.
«ءسوزىمدى تۇركيا رەسپۋبليكاسىنىڭ تاۋەلسىزدىك جولىندا جان پيدا ەتكەن اتا-بابالارىمىزدىڭ رۋحىنا تاعزىم ەتۋدەن باستاعىم كەلەدى. بۇدان 100 جىل بۇرىن انادولى جەرىن باتىر بابالارىمىز ءوز جانىن قۇربان ەتە وتىرىپ، ساقتاپ قالدى. بۇگىن ءبىز 100 جىلدىق مەرەيتويىمىزدى تويلاپ جاتىرمىز. بۇل – مەرەكە! ال ءبىزدى وسىنداي مەرەكەنى تويلايتىن كۇنگە جەتكىزگەن – كوشباسشىمىز مۇستافا كەمال اتاتۇرىك پەن ۇلت جاناشىرلارى. مۇنى ەشقاشان ۇمىتپايمىز! تۇركيا رەسپۋبليكاسىنىڭ 100 جىلدىق مەرەيتويى قۇتتى بولسىن! باۋىرلاس قازاقستاننىڭ دا 100 جىل، 200 جىلدىعىن اتاپ وتەتىن كۇنگە جەتە بەرەيىك» دەدى ۋنيۆەرسيتەتتىڭ وكىلەتتى كەڭەس ءتوراعاسى مۋحيتتين شيمشەك.
سالتاناتتى كەشتە تۇركىستان وڭىرىنە ادال قىزمەت ەتىپ، ەڭبەك ءسىڭىرىپ جۇرگەن ۋنيۆەرسيتەتتە قىزمەت ەتىپ جۇرگەن تۇركيالىق ماماندار مەن وقىتۋشىلار تۇركىستان وبلىسىنىڭ اكىمى دارحان ساتىبالدىنىڭ جانە تۇركىستان قالاسىنىڭ اكىمى نۇربول تۇراشبەكوۆتىڭ العىس حاتىمەن ماراپاتتالدى.
شارا «اكتەرلىق ونەر» ماماندىعى ستۋدەنتتەرىنىڭ ەرجۇرەك تۇرىك ەلىنىڭ ەگەمەندىك جولىنداعى كۇرەسى باياندالاتىن تەاترلاندىرىلعان كورىنىسپەن جالعاستى. سونداي-اق «اتامەكەن» ۇلت-اسپاپتار ءانسامبلى داۋلەتكەرەيدىڭ «كوروعلىسىن» ورىنداپ، انشىلەر قۇلاق قۇرىشىن قاندىراتىن اندەر شىرقادى، «بي سۇلتان» بي ءانسامبلى بيدەن شاشۋ شاشتى.
