ءوڭىر باسشىسى ينۆەستورعا تۇركىستان ءوڭىرىنىڭ ينۆەستيسيالىق الەۋەتىن تانىستىرىپ، جۇمىس ىستەۋگە شاقىردى. جوبانى جان-جاقتى تالقىلاپ، قولداۋ كورسەتىلەتىنىن جەتكىزدى.
– تۇركىستانعا قوش كەلدىڭىزدەر! تۇركىستان قازاق ەلى ءۇشىن، تۇركى الەمى ءۇشىن – قاسيەتتى قالا. مۇندا ۇلى ويشىل قوجا احمەت ياساۋي ءومىر سۇرگەن. قازاق حاندىعىنىڭ استاناسى بولعان. بەس جىل بۇرىن تۇركىستان وبلىسى قۇرىلىپ، تاريحي شاھار وبلىس ورتالىعىنا اينالدى. ءبىز تۇركىستان ءوڭىرى مەن وبلىس ورتالىعىن ءوندىرىسى، كاسىپكەرلىگى دامىعان ورتالىققا اينالدىرۋدى كوزدەپ وتىرمىز. سىزدەرمەن بىرلەسە جۇمىس ىستەۋگە مۇددەلىمىز.
زاۋىت سالۋعا جەر، ينفراقۇرىلىم جانە وزگە دە ماسەلەلەر بويىنشا قولداۋ كورسەتەمىز. جەرىلىكتى مامانداردى بىرلەسە دايارلاۋعا دا دايىنبىز. ارنايى ەكونوميكالىق ايماق، يندۋستريالدى ايماقتارىمىز بار. جول كارتاسىن ازىرلەپ، ەكى تاراپ ءوز مىندەتتەرىمىزدى ورىنداۋ مەرزىمىن ناقتىلايىق. سول بويىنشا جۇمىس جۇرگىزەمىز، – دەدى دارحان ساتىبالدى.
يگور گۋمەننىي قازاقستاندا الىپ كاسىپورىن اشۋعا نيەتتى ەكەنىن ايتا كەلە جىلى قارسى العان تۇركىستان وبلىسى اكىمىنە ريزاشىلىعىن ءبىلدىردى.
– «UBC Group» – شىعىس ەۋروپاداعى ەڭ تانىمال ءارى وندىرىستىك قۋاتى مىقتى كومپانيالاردىڭ ءبىرى. 5500 ادام جۇمىس ىستەيدى. ءبىزدىڭ زاۋىتتاردا وندىرىلگەن سالقىنداتقىش تەحنيكالارى، سۋسىنداردى ساقتايتىن توڭازىتقىشتار مەن سالقىنداتىلعان تاۋار سورەلەرى، شكافتارى ەۋروپا مەن ازيا ەلدەرىندە سۇرانىسقا يە.
سۋسىن شىعاراتىن اتاقتى ترانسۇلتتىق كومپانيالار بىزبەن تىعىز جۇمىس ىستەيدى. تۇركىستانعا ءبىر زاۋىتىمىزدى اشاتىن بولساق، باستاپقىدا 300 ادام، تولىق قۋاتىنا ەنگەندە 1200 جۇمىسشى قاجەت بولادى.
جەرگىلىكتى تۇرعىنداردى ۇيرەتۋ ءۇشىن ماماندار دا شاقىرىلادى. بىزگە ازىرگە جالعا ۇلكەن عيمارات بەرىلسە، كەيىن جەر قاراستىرىلسا، جانە ءتيىستى قولداۋلار بولسا، ارىپتەستىك ورناتا الامىز. تۇركىستاندا شىعارىلعان تاۋاردىڭ 60 پايىزىن ەكسپورتقا شىعارۋدى جوسپارلاپ وتىرمىز، – دەدى ول.
كەزدەسۋ بارىسىندا قوس تاراپ جوبانى جان-جاقتى زەردەلەپ، بىرلەسە جۇمىس ىستەۋگە ۋاعدالاستى. وسى ءىسساپارىندا ينۆەستورلار تۇركىستانداعى ارنايى ەكونوميكالىق ايماق پەن يندۋستريالدى ايماقتى ارالاپ كوردى. سونىمەن بىرگە كەنتاۋ قالاسى مەن ورداباسى اۋدانىنداعى يندۋستريالدى ايماقتاردىڭ جۇمىسىمەن تانىسادى.
«UBC Group» ساۋدا-ونەركاسىپ حولدينگى – توڭازىتقىش تەحنيكاسى سالاسىندا جۇمىس ىستەيتىن الەمدىك كوشباسشىلاردىڭ ءبىرى.
كومپانيا الەمنىڭ 120 ەلىنە ءونىم جەتكىزەدى.
