جيىنعا تۇركىستان وبلىستىق ءدىن ىستەرى باسقارماسىنىڭ باسشىسى رۇستەم سابىرجان ۇلى جەتەكشىلىك جاساپ، جۇرگىزىپ وتىردى. كەزدەسۋدە ەل بىرلىگىن ساقتاۋ، ءدىنارالىق قارىم-قاتىناستاردى نىعايتۋ ماسەلەلەرى تالقىلاندى.
– سىزدەردى 18 قازان – رۋحاني كەلىسىم كۇنى مەرەكەسىمەن شىن جۇرەكتەن قۇتتىقتايمىن! رۋحاني كەلىسىم كۇنى وزدەرىڭىزبەن كەلەلى كەڭەس قۇرىپ، پىكىر الماسۋدى ءجون كوردىك. ءدىن – ساياساتتان بولەك، مەملەكەتتەن بەيتاراپ بولعانمەن، رۋحاني قۇندىلىق رەتىندە اجىراي المايدى. ەلىمىزدە ءدىني كونفەسسيا وكىلدەرىنىڭ ءبىر شاڭىراقتىڭ استىندا اۋىزبىرلىكتە ءومىر ءسۇرۋى مەملەكەتتىڭ دامۋىنا وڭ اسەر ەتەدى، – دەدى باسقارما باسشىسى.
كەزدەسۋ بارىسىندا قازاقستان مۇسىلماندارى ءدىني باسقارماسىنىڭ تۇركىستان وبلىسى بويىنشا وكىل يمامى قاراقۇلوۆ ەركەبۇلان، «شىمكەنت ەپارحياسىنىڭ تۇركىستان قالاسىنداعى سۆياتو-نيكولسكيي پريحودى» جەرگىلىكتى پراۆوسلاۆيەلىك ءدىني بىرلەستىگىنىڭ جەتەكشىسى سموليانوۆ ۆيتاليي جانە باسقا دا ءدىن وكىلدەرى ءسوز سويلەدى. سونىمەن بىرگە وبلىستىق ءماسليحات دەپۋتاتى الماس ساليموۆ تە ءسوز سويلەپ، پىكىرىن ءبىلدىردى.
كەزدەسۋ سوڭىندا ءدىني كونفەسسيالار جەتەكشىلەرىنە مەرەكەگە وراي العىس حاتتار مەن سىيلىقتار بەرىلدى.
