تۇركىستان وبلىسىندا قارجى پيراميداسىن ۇيىمداستىرۋ ءىسى بويىنشا سوت ۇكىمى شىقتى. ايىپتالۋشىلار ورىندىعىندا 20 ادام وتىر. ولاردىڭ اراسىندا مۇعالىمدەر، دارىگەرلەر، بۋحگالتەرلەر جانە جۇمىسسىزدار بار، دەپ حابارلايدى Dalanews.kz 31 ارنا-عا سىلتەمە جاساپ.

ءىس ماتەريالدارىنا سايكەس، قارجى پيراميداسىنىڭ قىزمەتىنە 279 سالىمشى تارتىلعان. الايدا سوت ولاردىڭ تەك 54ء-ىن جابىرلەنۋشى رەتىندە تانىدى.

سوتتالعانداردىڭ ەڭ جاسى – 24 جاستا، ال ەڭ ۇلكەنى – 65-تە. الاياقتاردىڭ ءبىرى بۇرىن دا سوتتى بولعان. كەيبىر ايىپتالۋشىلار كىناسىن ءىشىنارا مويىندادى. ەكى ادام 5 جارىم جىلعا باس بوستاندىعىنان ايىرىلسا، ون ەكى ادامعا 2 جىلعا بوستاندىعىن شەكتەۋ جازاسى بەرىلدى. تاعى بەس ادام 3 جىلعا سوتتالدى.

“ۇيىمداستىرۋشىلاردىڭ ءبىرى قىلمىستىق كودەكستىڭ 217-بابى 3-بولىگىنىڭ 2-تارماعى – "قارجى (ينۆەستيسيالىق) پيراميداسىن قۇرۋ جانە وعان باسشىلىق ەتۋ" بويىنشا كىنالى دەپ تانىلىپ، 7 جىلعا باس بوستاندىعىنان ايىرىلدى. سونىمەن قاتار وعان ءدال وسى مەرزىمگە حالىقتان قارجى تارتۋ جانە ينۆەستيسيا سالاسىنا قاتىستى قىزمەتپەن اينالىسۋعا تىيىم سالىندى”، – دەپ حابارلادى وبلىستىق سوتتا.

جابىرلەنۋشىلەرگە كەلتىرىلگەن زالالدىڭ جالپى سوماسى 392 ميلليون تەڭگەگە جەتىپ وتىر. بۇل قاراجاتتى ءوندىرۋ ءىسى ءالى الدا.