تاريحي تامىرلارىمىز بەن تۇلعالار جايلى جاس ۇرپاققا ماعلۇمات بەرىپ، مۋزەي قورىندا كوزدىڭ قاراشىعىنداي ساقتالىپ كەلە جاتقان ءتول مۇرالاردى ناسيحاتتاۋعا ارنالعان ءدارىستى قورىق-مۋزەيدىڭ قىزمەتكەرى ارداق بەيسەنوۆا جۇرگىزدى.
– تاريحىمىز بەن مۇرالارىمىزدى ۇرپاق ساناسىنا ءسىڭىرىپ، الىپبيدەي جاتتاتۋ وتكەنىمىزگە قۇرمەت، ال بولاشاققا اماناتىمىز بولارى انىق. ەلباسى نۇرسۇلتان ءابىش ۇلىنىڭ دا سان قىرلى باعدارلامالىق ماقالالارىنىڭ ءتۇپ تامىرى وسى جايتتى كوكسەيدى. بابالار ءجۇرىپ وتكەن سارا جول، ۇرپاق ءۇشىن دارا جول بوپ قالۋى ءتيىس. وتكەننىڭ تاريحىن، ءىزىن، سىرىن ۇعىنباي تاريحقا ءتاۋ ەتىپ، ۇلىلارعا باس يدىك دەۋىمىز ورىنسىز. «ازىرەت سۇلتان» مەملەكەتتىك تاريحي-مادەني قورىق-مۋزەيى ماقسات ەتكەن شارانىڭ دا ءمانى وسى. ەلباسى ماقالاسىنىڭ مازمۇنىن ۇلىلار تاريحىن دارىپتەي وتىرىپ جەتكىزۋ، – دەيدى ارداق بەيسەنوۆا.
تاريحي ءدارىس بارىسىندا قازاق حانى، ۇلى مەملەكەت قايراتكەرى، قولباسشى جانە ديپلومات ابىلاي حان جايلى مالىمەتتەر ايتىلىپ، وقۋشىلار پىكىرى دە نازارعا الىندى.
ابىلاي حان (شىن ەسىمى ءابىلمانسۇر) – 1711-1781جىلدارى ءومىر سۇرگەن. ارعى تەگى جوشى حان، بەرگى بابالارى قازاق دالاسىنىڭ نەگىزىن سالعان از-جانىبەك، ودان سوڭ ەڭسەگەي بويلى ەر ەسىم، سالقام جاڭگىر حان. ابىلاي – جاڭگىر حاننىڭ بەسىنشى ۇرپاعى.
"ازىرەت سۇلتان" مەملەكەتتىك تاريحي-مادەني قورىق-مۋزەيىنىڭ باسپا ءسوز قىزمەتى
