بۇگىن ق ر سىبايلاس جەمقورلىققا قارسى ءىس-قيمىل اگەنتتىگىنىڭ (سىبايلاس جەمقورلىققا قارسى قىزمەت) تۇركىستان وبلىسى بويىنشا دەپارتامەنتىنىڭ باستاماسىمەن تۇركىستان قالالىق اكىم اپپاراتىنىڭ قىزمەتكەرلەرى مەن اكىمدىككە قاراستى دەربەس بولىمدەرىنىڭ جانە مەملەكەتتىك مەكەمە باسشىلارىنىڭ قاتىسۋىمەن كەزدەسۋ ءوتتى.   

كەزدەسۋگە قاتىسقان ق ر سىبايلاس جەمقورلىققا قارسى ءىس-قيمىل اگەنتتىگىنىڭ تۇركىستان وبلىسى بويىنشا دەپارتامەنت باسشىسىنىڭ ءبىرىنشى ورىنباسارى  عانيجان اسان ۇلى قوعام اراسىندا ادالدىق، پاراساتتىلىق، ادىلدىك جانە سەنىم قۇندىلىقتارىن باسشىلىققا الىپ ءومىر ءسۇرۋ – سىبايلاس جەمقورلىق تاۋەكەلدەرىنىڭ الدىن الۋدىڭ ماڭىزدى قۇرالى ەكەنىن اتاپ ءوتتى.

150-گە جۋىق قىزمەتكەرلەر قاتىسقان كەزدەسۋدە الەۋمەتتىك سالالاردا، ونىڭ ىشىندە كوپ بالالى وتباسىلارعا جاردەماقىنى بەلگىلەۋ، جەر ۋچاسكىلەرىنىڭ نىسانالى ماقساتىن وزگەرتۋ مەن مەكتەپتەردە زاڭسىز اقشا جيناۋ تۋرالى اقپاراتتار دەپارتامەنتتىڭ «WhatsApp» جەلىسىندەگى سەنىم تەلەفونىنا  كوپتەپ كەلىپ ءتۇسىپ جاتقاندىعى ايتىلدى.

كەمشىلىكتەردىڭ جۇيەلىلىگىنە بايلانىستى، دەپارتامەنتتىڭ باستاماسىمەن اتالعان سالالاردا سىبايلاس جەمقورلىق تاۋەكەلدەرىنە سىرتقى تالداۋ جۇرگىزىلەتىنى جەتكىزىلدى.

سونداي-اق، تەكسەرۋ جۇمىستارىن جۇرگىزۋگە بارعان قىزمەتكەرلەرگە سىيلىق بەرۋگە جانە قىزمەت كورسەتۋگە بولمايتىنىن قاتاڭ ەسكەرتىپ، زاڭبۇزۋشىلىققا جول بەرگەندەر جاۋاپكەرشىلىككە تارتىلاتىنىن تىلگە تيەك ەتتى.

جيىندى قورىتىندىلاعان ع.اسان ۇلى مەملەكەتتىك قىزمەتشىلەردى سەنىپ تاپسىرىلعان مىندەتتى جوعارى ابىرويمەن اتقارۋعا ۇندەپ، ءوز ىس-ارەكەتتەرىمەن كيەلى ءوڭىر اتىنا كىر كەلتىرمەۋگە شاقىردى.

شارا سوڭىندا قاتىسۋشىلاردىڭ  قوعامدىق ساناسىنا اسەر ەتۋ قۇرالى رەتىندە وبلىستا، ونىڭ ىشىندە تۇركىستان قالاسىندا ورىن العان سىبايلاس جەمقورلىق فاكتىلەرى بويىنشا ارنايى ازىرلەنگەن بەينەروليك كورسەتىلدى.