تۇركىستان وبلىسىنىڭ 1 جىلدىق مەرەكەسىندە اشىلعان بۇل فوتوكلۋب ق.ا.ياساۋي اتىنداعى حقتۋ-مەن تىكەلەي جۇمىس ىستەيدى. ءتۇرلى تاقىرىپتاردا فوتوەكسپەديسيالار ۇيىمداستىرىپ، وڭىردەگى ءتۋريزمدى دامىتۋ ءىسىن ناسيحاتتايدى.
فوتوكلۋبتىڭ اشىلۋ سالتاناتىندا قوناقتار «ۇلى دالانىڭ تۇركىستانى» اتتى رەسپۋبليكالىق فوتوەكسپەديسيا مۇشەلەرىنىڭ تۇسىرگەن سۋرەتتەرىن تاماشالادى.
«رۋحاني جاڭعىرۋ» باعدارلاماسى مەن «ۇلى دالانىڭ جەتى قىرى» ماقالاسىنداعى مىندەتتەردى ورىنداۋ، ءوڭىردىڭ كيەلى جانە تۋريستىك ورىندارىن ناسيحاتتاۋ ماقساتىندا ۇيىمداستىرىلعان فوتوەكسپەديسيانىڭ ماقساتى ورىندالدى. ءبىر اپتا بويى ءوڭىردىڭ كيەلى جانە تۋريستىك ورىندارىن تۇسىرگەن ەكسپەديسيا مۇشەلەرىنىڭ 40-قا جۋىق سۋرەتى قويىلدى. ولاردىڭ ىشىندە تۇركىستان، كەنتاۋ قالالارىمەن قاتار، سوزاق، بايدىبەك، وتىرار، سايرام، تولە بي، تۇلكىباس جانە قازىعۇرت اۋدانىنىڭ كيەلى جانە تۋريستىك ورىندارى، تابيعاتى تاماشا مەكەندەر مەن حالىقتىڭ تۇرمىس-تىرشىلىگىنەن سىر شەرتەتىن سۋرەتتەر بار.
تۇركىستان قالاسىنا كوشىپ كەلىپ، ارنايى فوتوستۋديا اشقان اسىلحان ءابدىرايىم ۇلىنىڭ جاڭا باستاماسى كوپشىلىكتى ءسۇيسىنتىپ وتىر.
«تۇركىستاندى تۇلەتۋ – پەرزەنتتىك پارىزىم. تۋعان جەرىمە قايتا ورالىپ، وسىندا شاكىرت تاربيەلەۋ جونىندە شەشىم قابىلدادىم. جاڭا تىنىسى اشىلعان تۇركىستاننىڭ دامۋىنا ءوز بىلىمىممەن، تاجىريبەممەن ۇلەس قوسقىم كەلەدى»، – دەگەن فوتوگراف الداعى ۋاقىتتا وسى ورتالىقتا ءتۇرلى تاقىرىپتاردا ءداستۇرلى تۇردە كورمەلەر وتكىزىپ، ەلدىڭ مادەني-ەستەتيكالىق تالعامىن بيىكتەتەتىن جوبالاردى جۇزەگە اسىرۋدى كوزدەپ وتىر.
«رۋحاني جاڭعىرۋ» باعدارلاماسى اياسىندا اشىلعان فوتوكلۋب تۇركىستان وبلىسىنىڭ جانە قاسيەتتى شاھاردىڭ وڭ ءيميدجىن ارتتىرىپ، جاستاردى ىزگىلىككە، فوتوونەرگە باۋليدى دەگەن سەنىم بار.
