تۇركىستاندا ەسترادا جۇلدىزدارىنىڭ قاتىسۋىمەن مەرەكەلىك كونسەرت ءوتتى

Dalanews 08 تام. 2023 12:36 387

تۇركىستان تورىندە وبلىس اكىمدىگىنىڭ جانە «Jibek joly» تەلەارناسىنىڭ ۇيىمداستىرۋىمەن كونسەرت ءوتتى. مەرەكەلىك شاراعا تۇركىستان وبلىسى اكىمىنىڭ ورىنباسارى بەيسەنباي تاجىبايەۆ ارنايى قاتىسىپ، قۇتتىقتاۋ ءسوز سويلەدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

– بيىل وبلىسىمىزدىڭ قۇرىلعانىنا 5 جىل! مۇندا ءقازىر ءتۇرلى مادەني-كوپشىلىك شارالار تۇراقتى ءوتىپ كەلەدى. اپتا سايىن كونسەرتتەر ۇيىمداستىرىلادى. بۇل كونسەرت تە سونىڭ جالعاسى ىسپەتتى.

«جىبەك جولى» دەگەن اتاۋ بىزگە تاڭسىق ەمەس. قاسيەتتى تۇركىستان قالاسى ۇلى جىبەك جولىنىڭ بويىندا ورنالاسقان بىردەن-بىر تاريحي شاھار. وزدەرىڭىز كورىپ وتىرعانىڭىزداي، از ۋاقىت ىشىندە وزگەرىپ، ادام تانىماستاي كەيىپكە ەندى. حالقى دا ەسەلەپ ارتتى.



قازىرگى تاڭدا تۇركىستان تەك ءوڭىردىڭ، ءتىپتى قازاقستاننىڭ عانا ەمەس، تۇركى الەمىنىڭ مادەني-رۋحاني تەمىرقازىعىنا اينالىپ وتىر. ءبىزدىڭ باستى قۇندىلىعىمىز – رۋحانيات پەن مادەنيەت. بارشاڭىزدى وسىناۋ مەرەكەمەن شىن جۇرەكتەن قۇتتىقتايمىن جانە شىنايى العىس بىلدىرەمىن، – دەدى بەيسەنباي داۋلەت ۇلى.




ال قازاقستان رەسپۋبليكاسى پرەزيدەنتى تەلەراديوكەشەنىنىڭ كرەاتيۆتى ديرەكتورى اسەل تۇرسىنعازينا ءوز كەزەگىندە كوپشىلىكتى مەرەكەمەن قۇتتىقتاپ، شارانىڭ ماقساتىنا توقتالدى. سونداي-اق، الداعى ۋاقىتتا اتالمىش كونسەرت «Jibek joly» تەلەارناسىنان كورسەتىلەتىنىن جەتكىزدى.

تاريحتاعى ۇلى جىبەك جولى – قىتايدىڭ شي-ان دەگەن جەرىنەن باستالىپ، شىڭجاڭ، ورتالىق ازيا ارقىلى تاياۋ شىعىسقا باراتىن كەرۋەندىك جول باعىتى. ال وسى ادامزات وركەنيەتى جاساعان تاريحي ەسكەرتكىشتىڭ اتىمەن اتالاتىن Jibek Joly – SilkWay تەلەارناسى ەۋروپا، ورتالىق ازيا، تاياۋ شىعىس جانە افريكانىڭ سولتۇستىك بولىگىنە حابار تاراتاتىن بىردەن-بىر قازاقستاندىق ارنا.



قالا تۇرعىندارى مەن قوناقتارىنا كوتەرىڭكى كوڭىل-كۇي سىيلاعان اقپاراتتىق جانە ويىن-ساۋىق جانرىنداعى شارانى انۋار كاربوزوۆ پەن جانسەرىك بەيسەيەۆ جۇرگىزدى. كونسەرتكە ەلىمىزگە بەلگىلى انشىلەر، اتاپ ايتقاندا ءمادينا ءسادۋاقاسوۆا، قۋاندىق راحىم جانە ش.قالداياقوۆ اتىنداعى وبلىستىق فيلارمونيانىڭ ۇجىمى ونەر كورسەتتى.

 

ۇسىنىلعان
سوڭعى جاڭالىقتار