ەسكەرتكىشتىڭ بيىكتىگى – ءتورت مەتر. قولادان جاسالعان ءمۇسىننىڭ اۆتورى – قازاقستاننىڭ ەڭبەك سىڭىرگەن رەستاۆراتورى، قازاقستان سۋرەتشىلەر وداعىنىڭ مۇشەسى تىلەۋبەردى بيناشيەۆ.
"ەسكەرتكىش ق ر تۇڭعىش پرەزيدەنتى – ەلباسى ن.نازاربايەۆتىڭ ەگىس القابىندا تۇسكەن فوتوسۋرەتىنە قاراپ جاسالعان. تۇركىستانداعى جاڭا اكىمشىلىك-ىسكەرلىك ورتالىعىندا ورناتىلعان ءمۇسىننىڭ كومپوزيسياسىندا "ۇلى دالانىڭ ۇلى" اتتى ەلباسى ەسكەرتكىشىندە قارت قاراتاۋدىڭ سۇلباسى بەينەلەنگەن. اۆتور ەلباسىنىڭ قاراتاۋ جازىعىندا شەكسىز دالاعا بايىپپەن قاراعان ءساتىن سۋرەتتەگەن"، - دەپ حابارلادى اكىمدىك.
نازاربايەۆقا ەسكەرتكىش قويۋ تۋرالى باستامانى كاسىپكەر بولاتبەك الييەۆ كوتەرىپ، اتالعان يدەياعا تۇركىستاندىق ارداگەر-اقساقالدار، زيالى قاۋىم وكىلدەرى، ءماسليحات دەپۋتاتتارى مەن كاسىپكەرلەر، قوعامدىق ۇيىم وكىلدەرى قولداۋ بىلدىرگەن.
تۇركىستان اكىمدىگى وسى باستاما بويىنشا جەرگىلىكتى تۇرعىندار اراسىندا ساۋالناما جۇرگىزدى.
“ساۋالناماعا 1000 رەسپوندەنت قاتىسىپ، ولاردىڭ 93% باستامانى قولدايتىندارىن بىلدىرگەن بولسا، رەسپوندەنتتەردىڭ 4،5% قارسى، 2،5% بەيتاراپ پوزيسيانى ۇستانعان"، - دەپ قورىتىندىلادى اكىمدىك.
