تۇركىستاندا ءبىر توپ ادامنىڭ بىرنەشە ۋچاسكەدە داۋىس بەرگەن ۆيدەوسى تارادى، دەپ حابارلايدى Dalanews.kz.

تۇركىستان قالاسىنىڭ تۇرعىنى نەسىبەلى حايرۋللا قىزى بىرنەشە ادامنىڭ ءارتۇرلى سايلاۋ ۋچاسكەلەرىنە بارىپ داۋىس بەرگەنىن مالىمدەدى.

ونىڭ ايتۋىنشا، ءبىر توپ ادام بىرنەشە ۋچاسكەنى ارالاپ، داۋىس بەرۋگە تىرىسقان.

«ءبىر ادام تەك ءبىر عانا سايلاۋ ۋچاسكەسىندە داۋىس بەرۋى كەرەك. ال بۇلار ءۇش ۋچاسكەگە كىرىپ، كارۋسەل جاساپ ءجۇر. بۇل - ناعىز قىلمىس»، - دەيدى قالا تۇرعىنى جاريالاعان ۆيدەودا.

كەيىن بەلسەندى قۇرال سەيىتحان ۇلى Facebook پاراقشاسىندا نەسىبەلى حايرۋللاقىزىن پوليسيا قىزمەتكەرلەرى مازالاپ جاتقانىن جازدى.

قازىرگى ۋاقىتتا تۇركىستان وبلىستىق پوليسياسى بۇل جاعدايعا قاتىستى رەسمي تۇسىنىكتەمە بەرگەن جوق.

بۇل جاعدايعا قاتىستى ازىرگە تەك "جولاۋشى" ج ش س ديرەكتورى راحىمجان ەركىنوۆ پىكىر ءبىلدىردى. 

"انىقتالعانى، قوعامدىق تاسىمال قىزمەتىن نەگىزىنەن جەكە كاسىپكەرلەر جۇزەگە اسىرادى. وسى رەفەرەندۋمدا وبلىس ورتالىعى تۇركىستان قالاسىندا جەكە تاسىمالداۋشى كومپانيا ءوز ەركىمەن قولداۋ ءبىلدىرىپ، قالا تۇرعىندارىنىڭ داۋىس بەرۋ ۋچاسكەلەرىنە بارۋىنا قولايلى جاعداي جاساۋ ماقساتىندا اۆتوبۋستارىن تەگىن ۇسىنعان. ايتا كەتۋ كەرەك، رەفەرەندۋم كۇنى ازاماتتاردى تاسىمالداۋ زاڭعا قايشى ەمەس. بۇل تۇرعىنداردىڭ ءوز كونستيتۋسيالىق قۇقىعىن جۇزەگە اسىرۋىنا قولايلى جاعداي جاساۋعا باعىتتالعان ۇيىمداستىرۋشىلىق شارالاردىڭ ءبىرى. سونىمەن قاتار، داۋىس بەرۋ – ءار ازاماتتىڭ ەرىكتى تاڭداۋى. جاريالانعان اقپارات شىندىققا جاناسپايتىندىعىن حابارلايمىز"، - دەيدى ەركىنوۆ.