تۇركىستان قالاسىندا العاش رەت ءسۇت جانە ەت باعىتىنداعى اسىل تۇقىمدى ەشكىلەردىڭ رەسپۋبليكالىق كورمەسى ءوتتى. ەرەكشە باستاما تۇركىستان وبلىسى اكىمدىگىنىڭ قولداۋىمەن «سەكسەك اتا» شارۋالارى ۇيىمداستىردى. كورمەگە قازاقستاننىڭ تۇكپىر-تۇكپىرىنەن قاتىسۋشىلار، ۆەتەريناريا سالاسىنىڭ وكىلدەرى مەن قوناقتار ارنايى كەلدى.
كورمەنىڭ ماقساتى — ەلىمىزدە اسىل تۇقىمدى ەشكى شارۋاشىلىعىن دامىتۋ، حالىقتى ەكولوگيالىق تازا ونىممەن تانىستىرۋ، ەشكى ءسۇتىنىڭ ادام اعزاسىنا پايداسىن ناسيحاتتاۋ، شارۋاشىلىقتار اراسىندا تاجىريبە الماسۋعا جاعداي جاساۋ. بۇعان دەيىن حالىقارالىق دەڭگەيدە وتكىزىلگەن كورمە ەل ىشىندە سۇرانىسقا يە بولعان. ءتىپتى كورشىلەس رەسەي، قىرعىزستان، وزبەكستان ازاماتتارى قىزىعۋشىلىق ءبىلدىرىپ، تىكەلەي ەفير ارقىلى تاماشالادى.
سونداي-اق، كورمەدە ەشكى سۇتىنەن جاسالعان قۇرت، ىرىمشىك، ايران، كوجە جانە يوگۋرت ونىمدەرى ۇسىنىلدى. ۇيىمداستىرۋ توپتىڭ جەتەكشىسى امانتاي جولدىباي ۇلىنىڭ ايتۋىنشا، بۇل ونىمدەردىڭ ادام دەنساۋلىعىنا پايداسى مول. حالىققا ەكولوگيالىق تازا ءونىمدى تۇتىنۋعا شاقىردى. ەشكى ءسۇتىنىڭ قۇرامىندا يممۋنوگلوبۋليندەر دە بار جانە ەجەلدەن بەرى تۋبەركۋلەز سياقتى كوپتەگەن اۋرۋلاردى ەمدەۋ جانە الدىن الۋ ءۇشىن قولدانىلادى.
كورمەگە زاانەن، ءالپى، لامانچا، انگلو-نۋب، بۋر، كاموري، گۋلابي سىندى شەتەلدەن اكەلىنگەن، سەلەكسيالى جانە ەڭ تانىمال تۇقىمدارى كورسەتىلدى. شاراعا جالپى سانى 200-گە جۋىق اسىل تۇقىمدى مال باسى قاتىستى. تىركەۋدەن سوڭ ەشكىلەردەن سىنامالار الىندى. اتاپ ايتقاندا، سىرت پىشىندەرى باعالاندى. بويلارى مەن سالماقتارى ولشەندى. ءسۇتىنىڭ مايلىلىعى مەن قۇنارلىعى زەردەلەنىپ، ەتتى باعىتى دا ەسكەرىلدى. قازىلار القاسى جەكە-جەكە ۇپاي قويىپ، ءادىل تۇردە ەڭ ەرەكشە ەشكى ءتۇرىن انىقتاۋعا اتسالىستى.
جارىس قورىتىندىسى بويىنشا ەڭ مول ءسۇت بەرەتىن اسىل تۇقىمدى ەشكى ءتۇرىن باپتاعان تۇركىستان ءوڭىرى، ەكستەرەرى بويىنشا شىمكەنت قالاسى، ەڭ اۋىر سالماق نەگىزىندە جامبىل وبلىسى ۇزدىك اتاندى. جالپى جۇلدە قورى — 3،5 ملن تەڭگە. بۇدان بولەك، نوميناسيا يەلەرىنە قوسىمشا كۋبوكتار جانە 300 مىڭ تەڭگەگە دەيىنگى باعالى سىيلىقتار ۇلەستىرىلدى. «ساۋىنشىلار»، «اسىلداندىرۋ»، «ەڭ كەرەمەت ءسۇت ونىمدەرى» نوميناسيا يەلەرى ولجاسىز قالمادى. سونىمەن قاتار، لاقتار سايىسى مەن ساۋىنشىلار جارىسى كوپتىڭ نازارىن اۋداردى. ءىس-شارانى ۇيلەستىرۋگە ۇلەس قوسقان سالا ارداگەرلەرىنە تۇركىستان وبلىسى اۋىل شارۋاشىلىعى باسقارماسىنىڭ توسبەلگىسى تابىستالدى. تىڭ فورماتتا ۇيىمداستىرىلعان كورمەگە 350-دەي ادام كەلىپ،تاماشالادى. ۇيىمداستىرۋشىلاردىڭ ايتۋىنشا، بۇل باستاما الداعى ۋاقىتتا دا ءوز جالعاسىن تاباتىن بولادى.
