Túrkistan qalasynda alǵash ret Sút jáne et baǵytyndaǵy asyl tuqymdy eshkilerdiń respýblikalyq kórmesi ótti. Erekshe bastama Túrkistan oblysy ákimdiginiń qoldaýymen «Seksek ata» sharýalary uiymdastyrdy. Kórmege Qazaqstannyń túkpir-túkpirinen qatysýshylar, veterinariia salasynyń ókilderi men qonaqtar arnaiy keldi.
Kórmeniń maqsaty — elimizde asyl tuqymdy eshki sharýashylyǵyn damytý, halyqty ekologiialyq taza ónimmen tanystyrý, eshki sútiniń adam aǵzasyna paidasyn nasihattaý, sharýashylyqtar arasynda tájiribe almasýǵa jaǵdai jasaý. Buǵan deiin halyqaralyq deńgeide ótkizilgen kórme el ishinde suranysqa ie bolǵan. Tipti kórshiles Resei, Qyrǵyzstan, Ózbekstan azamattary qyzyǵýshylyq bildirip, tikelei efir arqyly tamashalady.
Sondai-aq, kórmede eshki sútinen jasalǵan qurt, irimshik, airan, kóje jáne iogýrt ónimderi usynyldy. Uiymdastyrý toptyń jetekshisi Amantai Joldybaiulynyń aitýynsha, bul ónimderdiń adam densaýlyǵyna paidasy mol. Halyqqa ekologiialyq taza ónimdi tutynýǵa shaqyrdy. Eshki sútiniń quramynda immýnoglobýlinder de bar jáne ejelden beri týberkýlez siiaqty kóptegen aýrýlardy emdeý jáne aldyn alý úshin qoldanylady.
Kórmege Zaanen, Alpi, Lamancha, Anglo-nýb, Býr, Kamori, Gýlabi syndy shetelden ákelingen, selektsiialy jáne eń tanymal tuqymdary kórsetildi. Sharaǵa jalpy sany 200-ge jýyq asyl tuqymdy mal basy qatysty. Tirkeýden soń eshkilerden synamalar alyndy. Atap aitqanda, syrt pishinderi baǵalandy. Boilary men salmaqtary ólshendi. Sútiniń mailylyǵy men qunarlyǵy zerdelenip, etti baǵyty da eskerildi. Qazylar alqasy jeke-jeke upai qoiyp, ádil túrde eń erekshe eshki túrin anyqtaýǵa atsalysty.
Jarys qorytyndysy boiynsha eń mol sút beretin asyl tuqymdy eshki túrin baptaǵan Túrkistan óńiri, ekstereri boiynsha Shymkent qalasy, eń aýyr salmaq negizinde Jambyl oblysy úzdik atandy. Jalpy júlde qory — 3,5 mln teńge. Budan bólek, nominatsiia ielerine qosymsha kýboktar jáne 300 myń teńgege deiingi baǵaly syilyqtar úlestirildi. «Saýynshylar», «Asyldandyrý», «Eń keremet sút ónimderi» nominatsiia ieleri oljasyz qalmady. Sonymen qatar, laqtar saiysy men saýynshylar jarysy kóptiń nazaryn aýdardy. Is-sharany úilestirýge úles qosqan sala ardagerlerine Túrkistan oblysy aýyl sharýashylyǵy basqarmasynyń tósbelgisi tabystaldy. Tyń formatta uiymdastyrylǵan kórmege 350-dei adam kelip,tamashalady. Uiymdastyrýshylardyń aitýynsha, bul bastama aldaǵy ýaqytta da óz jalǵasyn tabatyn bolady.
