تۇركىستان قالاسىندا «مانساپ» ورتالىعىنىڭ ۇيىمداستىرۋىمەن جۇمىسشى ماماندىقتار جىلى اياسىندا بورىشكەرلەرگە، پروباسيا قىزمەتى ەسەبىندە تۇرعان ازاماتتارعا، باس بوستاندىعىنان ايىرۋ ورىندارىنان بوساتىلعان تۇلعالارعا جانە مۇگەدەكتىگى بار جۇمىسقا جارامدى ازاماتتارعا ارنالعان كەزەكتى بوس جۇمىس ورىندارى جارمەڭكەسى ءوتتى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
جارمەڭكەگە قاتىسقان جۇمىس بەرۋشى مەكەمەلەر تومەندەگىدەي جۇمىس ورىندارىن ۇسىندى:
تۇراقتى جۇمىس – 22 مەكەمە، 115 بوس جۇمىس ورنى؛ “جاستار پراكتيكاسى” – 100-دەن اسا مەكەمە، 1 382 بوس جۇمىس ورنى؛ “قوعامدىق جۇمىستار” – 100-دەن اسا مەكەمە، 583 بوس جۇمىس ورنى؛ “الەۋمەتتىك جۇمىس ورىندارى” – 20-دان استام مەكەمە، 73 بوس جۇمىس ورنى؛ “كۇمىس جاس” جوباسى – 11 مەكەمە، 41 بوس جۇمىس ورنى.
جارمەڭكە بارىسىندا جۇمىس ىزدەۋشىلەر جۇمىس بەرۋشىلەرمەن تىكەلەي كەزدەسىپ، سۇحباتتاسۋ مۇمكىندىگىنە يە بولدى. سونىمەن قاتار ولار جۇمىسپەن قامتۋ باعدارلامالارى مەن ەڭبەك نارىعىنداعى مۇمكىندىكتەر تۋرالى تولىققاندى اقپارات الدى.
بۇل شارا الەۋمەتتىك وسال توپتارعا قولداۋ كورسەتۋگە، ولاردىڭ تۇراقتى جۇمىسپەن قامتىلۋىنا جانە كاسىبي بەيىمدەلۋىنە ىقپال ەتۋدى كوزدەيدى.
