1536 پاتەردەن تۇراتىن باسپانالاردىڭ 1200 پاتەرى (20 تۇرعىن ءۇي) ارەندالىق ۇيلەر بولىپ تابىلسا، قالعان 6 تۇرعىن ءۇي، ياعني 336 پاتەر كرەديتتىك باسپانالارعا جاتادى.
ىرگەتاسى وسى جىلدىڭ قىركۇيەك ايىندا قالانىپ، مەملەكەتتىك بيۋدجەت ەسەبىنەن سالىنىپ جاتقان 60 پاتەرلى 20 تۇرعىن ءۇيدىڭ 11ء-ى (660 پاتەر) 2019 جىلدىڭ ءساۋىر ايىندا تاپسىرىلادى. قالعان 9 تۇرعىن ءۇي (540 پاتەر) قۇرىلىسى قاراشا ايىندا باستالعان-دى. تاپسىرىلۋ مەرزىمى كەلەر جىلدىڭ قاراشا ايىنا جوسپارلانعان.
ال كرەديتتىك كوپقاباتتى 6 تۇرعىن ءۇيدىڭ (336 پاتەر) قۇرىلىس جۇمىستارى «تۇركىستان اكك» اق جانە جەكە سالۋشى ەسەبىنەن جۇرگىزىلىپ جاتىر. نىساندار 2019 جىلدىڭ ماۋسىم ايىندا پايدالانىلۋعا بەرىلەدى.
«بارلىق پاتەرلەر «7-20-25» باعدارلاماسى اياسىندا بوي كوتەرەدى. سوندىقتان، حالىققا بەرىلەتىن باسپانالاردىڭ ساپاسىنا ءمان بەرىپ، مەرزىمىندە اياقتاۋ جۇمىستارىن نازارعا الىڭىزدار. بۇگىنگە دەيىن شاھارداعى «وتىرار» شاعىن اۋدانىندا قىسقا مەرزىمدە مەملەكەتتىك-جەكەشەلىك ارىپتەستىك ارقىلى 280 ورىندىق بالاباقشانىڭ قۇرىلىسى جۇرگىزىلىپ، 2018 جىلدىڭ قىركۇيەك ايىندا حالىق يگىلىگىنە ۇسىنىلادى. ەندىگى كەزەك ناق وسى شاعىن اۋداندا بوي كوتەرىپ جاتقان 900 ورىندىق مەكتەپتىڭ ەسىگىن جاڭا وقۋ جىلىنا دەيىن اشۋ مىندەتى تۇر»، — دەدى وبلىس اكىمى.
سونىمەن قاتار، «وتىرار» شاعىن اۋدانىنداعى 20 تۇرعىن ءۇيدىڭ ينجەنەرلىك-كوممۋنيكاسيالىق ينفراقۇرىلىمى (جىلۋ-، سۋ-، كارىز-، بايلانىس جەلىلەرى) جانە اباتتاندىرۋى بويىنشا قۇرىلىس جۇمىستارى قارقىندى جۇرگىزىلۋدە. 2019 جىلدىڭ قاراشا ايىندا اياقتالۋى ءتيىس.
ءوڭىر باسشىسى ايماقتاعى قۇرىلىس سالاسىنا جاۋاپتى باسشىلارمەن ءوزارا اڭگىمەدە اكىمشىلىك-ىسكەرلىك ورتالىقتىڭ 7،25 گا جەر تەلىمىنە ءۇش اكىمشىلىك نىسانىنىڭ قۇرىلىس جۇمىستارى باستالعانىن دا ايتىپ ءوتتى. «BI group» ءجشس-ى ينۆەستورى بولىپ تابىلاتىن جوبانى پايدالانۋعا تاپسىرۋ 2019 جىلدىڭ جەلتوقسانىنا كوزدەلگەن. سونىمەن بىرگە، ىسكەرلىك كەزدەسۋدە بەس جۇلدىزدى «ريكسوس» قوناق ءۇيىنىڭ قۇرىلىس جۇمىستارى دا ءتيىستى دەڭگەيدە اتقارىلىپ جاتقانى ءسوز بولدى.
جالپى، تۇركىستان قالاسىنىڭ باس جوسپارى بەكىتىلگەننەن سوڭ ينۆەستورلارعا، «7-20-25» باعدارلاماسى بويىنشا تۇرعىن ءۇي قۇرىلىسىنا ات سالىسۋعا نيەت ءبىلدىرۋشى قۇرىلىس كومپانيالارىنا قاجەتتى ينفراقۇرىلىممەن قامتاماسىز ەتىلگەن جەر تەلىمدەرى ۇسىنىلاتىن بولادى.
