Túrkistanda 26 turǵyn úidiń qurylysy júrip jatyr
1536 páterden turatyn baspanalardyń 1200 páteri (20 turǵyn úi) arendalyq úiler bolyp tabylsa, qalǵan 6 turǵyn úi, iaǵni 336 páter kredittik baspanalarǵa jatady.
Irgetasy osy jyldyń qyrkúiek aiynda qalanyp, memlekettik biýdjet esebinen salynyp jatqan 60 páterli 20 turǵyn úidiń 11-i (660 páter) 2019 jyldyń sáýir aiynda tapsyrylady. Qalǵan 9 turǵyn úi (540 páter) qurylysy qarasha aiynda bastalǵan-dy. Tapsyrylý merzimi keler jyldyń qarasha aiyna josparlanǵan.
Al kredittik kópqabatty 6 turǵyn úidiń (336 páter) qurylys jumystary «Túrkistan ÁKK» AQ jáne jeke salýshy esebinen júrgizilip jatyr. Nysandar 2019 jyldyń maýsym aiynda paidalanylýǵa beriledi.
«Barlyq páterler «7-20-25» baǵdarlamasy aiasynda boi kóteredi. Sondyqtan, halyqqa beriletin baspanalardyń sapasyna mán berip, merziminde aiaqtaý jumystaryn nazarǵa alyńyzdar. Búginge deiin shahardaǵy «Otyrar» shaǵyn aýdanynda qysqa merzimde memlekettik-jekeshelik áriptestik arqyly 280 oryndyq balabaqshanyń qurylysy júrgizilip, 2018 jyldyń qyrkúiek aiynda halyq igiligine usynylady. Endigi kezek naq osy shaǵyn aýdanda boi kóterip jatqan 900 oryndyq mekteptiń esigin jańa oqý jylyna deiin ashý mindeti tur», — dedi oblys ákimi.
Sonymen qatar, «Otyrar» shaǵyn aýdanyndaǵy 20 turǵyn úidiń injenerlik-kommýnikatsiialyq infraqurylymy (jylý-, sý-, káriz-, bailanys jelileri) jáne abattandyrýy boiynsha qurylys jumystary qarqyndy júrgizilýde. 2019 jyldyń qarasha aiynda aiaqtalýy tiis.
Óńir basshysy aimaqtaǵy qurylys salasyna jaýapty basshylarmen ózara áńgimede ákimshilik-iskerlik ortalyqtyń 7,25 ga jer telimine úsh ákimshilik nysanynyń qurylys jumystary bastalǵanyn da aityp ótti. «BI group» JShS-i investory bolyp tabylatyn jobany paidalanýǵa tapsyrý 2019 jyldyń jeltoqsanyna kózdelgen. Sonymen birge, iskerlik kezdesýde bes juldyzdy «Riksos» qonaq úiiniń qurylys jumystary da tiisti deńgeide atqarylyp jatqany sóz boldy.
Jalpy, Túrkistan qalasynyń bas jospary bekitilgennen soń investorlarǵa, «7-20-25» baǵdarlamasy boiynsha turǵyn úi qurylysyna at salysýǵa niet bildirýshi qurylys kompaniialaryna qajetti infraqurylymmen qamtamasyz etilgen jer telimderi usynylatyn bolady.
