تۇركىستان قالاسىندا وتكەن «كيەلى تۇركىستان جانە تۇركى دۇنيەسىنىڭ رۋحاني جاڭعىرۋى» اتتى عىلىمي-تەوريالىق كونفەرەنسيادا ءبىرقاتار عالىمدار مەن قايراتكەرلەر جانە ب ا ق وكىلدەرى ماراپاتتالدى.

بيىل كونە تۇركى جازۋىنىڭ العاش وقىلعانىنا 125 جىل تولىپ وتىر.

وسىعان وراي، جازۋدى العاش وقىعان عالىمنىڭ اتىنداعى سىيلىق ازىرلەنگەن بولاتىن.

تۋركولوگيا سالاسىنا عالىم ءارى ساياساتكەر رەتىندە ەڭبەك سىڭىرە بىلگەن تۇركىستان وبلىسىنىڭ اكىمى جانسەيىت تۇيمەبايەۆقا وسى ۆيلگەلم تومسەن مەدالى سالتاناتتى تۇردە تاپسىرىلدى.

ءوڭىر باسشىسىمەن بىرگە 4 عالىم اتالعان مەدالمەن ماراپاتتالدى.



كونفەرەنسيادا تۇركى تىلدەس حالىقتاردىڭ بىرلىگىن، ءبىلىم، عىلىم، مادەنيەت سالاسىنداعى جەتىستىكتەرىن ناسيحاتتاپ جۇرگەن ب ا ق وكىلدەرىنە TWESCO-نىڭ يسمايل گاسپىرالى اتىنداعى مەديا سىيلىعى تاپسىرىلدى. اتالعان سىيلىق بيىل «باسپا ءسوز» «تەلەارنا» جانە «اقپارات اگەنتتىگى جانە ينتەرنەت» اتالىمدارى بويىنشا 6 ازاماتقا بەرىلدى.

سونىمەن قاتار، تۇركى دۇنيەسىنە قاتىستى جاڭالىقتار مەن ەلەۋلى وقيعالاردى ماسس-مەديادا ۇدايى كورسەتىپ، تۇركىتىلدەس ەلدەردىڭ اقپارات سالاسىنداعى بايلانىستارىن نىعايتۋعا ۇلەس قوسىپ جۇرگەن جۋرناليستەرگە TWESCO-نىڭ العىس حاتتارى تابىس ەتىلدى.

TWESCO بيىل يۋنەسكو شتاب-پاتەرىندە وتكىزگەن فورۋمدا ءبىرقاتار شەشىمدەر قابىلدادى. اتاپ ايتساق، 2018 جىلدى اقيىق اقىن ماعجان جۇمابايەۆتىڭ تۋعانىنا 125 جىل تولۋىنا وراي «ماعجان جىلى»، ۇلى جازۋشى شىڭعىس ايتماتوۆتىڭ 90 جىلدىعىنا بايلانىستى «ايتماتوۆ جىلى» جانە تۇركى جازۋىنىڭ العاش وقىلۋىنىڭ 125 جىلدىعىنا قاتىستى «تۇركى جازۋى جىلى» دەپ جاريالاعان بولاتىن. وسىعان وراي، اتالعان باعىتتاردا جۇزەگە اسىرىلعان جوبالارعا اتسالىسقان عالىمدار مەن قايراتكەرلەر اكادەميا تاراپىنان قولداۋعا يە بولادى.

حالىقارالىق عىلىمي-تەوريالىق كونفەرەنسياعا قاتىسقان قازاقستاندىق جانە شەتەلدىك دەلەگاتتار تۇركىستان وبلىسىنىڭ قاسيەتتى ورىندارىن ارالاپ، ق.ا.ياساۋي كەسەنەسىنە زيارات جاسادى. تاريحشىلار مەن عالىمدار جانە فيلولوگتار «رۋحاني جانە عىلىمي سالالارعا قولداۋ كورسەتۋ جالعاسىن تاپسا، تۇركىستاننىڭ بولاشاعى جارقىن بولادى» دەي كەلە كونفەرەنسيانى جوعارى دەڭگەيدە ۇيىمداستىرعان تۇركىستان جۇرتشىلىعىنا ريزاشىلىقتارىن ءبىلدىردى.