Bıyl kóne túrki jazýynyń alǵash oqylǵanyna 125 jyl tolyp otyr.
Osyǵan oraı, jazýdy alǵash oqyǵan ǵalymnyń atyndaǵy syılyq ázirlengen bolatyn.
Týrkologıa salasyna ǵalym ári saıasatker retinde eńbek sińire bilgen Túrkistan oblysynyń ákimi Janseıit Túımebaevqa osy Vılgelm Tomsen medaly saltanatty túrde tapsyryldy.
Óńir basshysymen birge 4 ǵalym atalǵan medalmen marapattaldy.
Konferensıada Túrki tildes halyqtardyń birligin, bilim, ǵylym, mádenıet salasyndaǵy jetistikterin nasıhattap júrgen BAQ ókilderine TWESCO-nyń Ismaıl Gaspyraly atyndaǵy medıa syılyǵy tapsyryldy. Atalǵan syılyq bıyl «Baspasóz» «Telearna» jáne «Aqparat agenttigi jáne ınternet» atalymdary boıynsha 6 azamatqa berildi.
Sonymen qatar, Túrki dúnıesine qatysty jańalyqtar men eleýli oqıǵalardy mass-medıada udaıy kórsetip, túrkitildes elderdiń aqparat salasyndaǵy baılanystaryn nyǵaıtýǵa úles qosyp júrgen jýrnalıserge TWESCO-nyń Alǵys hattary tabys etildi.
TWESCO bıyl IýNESKO shtab-páterinde ótkizgen forýmda birqatar sheshimder qabyldady. Atap aıtsaq, 2018 jyldy aqıyq aqyn Maǵjan Jumabaevtyń týǵanyna 125 jyl tolýyna oraı «Maǵjan jyly», uly jazýshy Shyńǵys Aıtmatovtyń 90 jyldyǵyna baılanysty «Aıtmatov jyly» jáne túrki jazýynyń alǵash oqylýynyń 125 jyldyǵyna qatysty «Túrki jazýy jyly» dep jarıalaǵan bolatyn. Osyǵan oraı, atalǵan baǵyttarda júzege asyrylǵan jobalarǵa atsalysqan ǵalymdar men qaıratkerler Akademıa tarapynan qoldaýǵa ıe bolady.
Halyqaralyq ǵylymı-teorıalyq konferensıaǵa qatysqan qazaqstandyq jáne sheteldik delegattar Túrkistan oblysynyń qasıetti oryndaryn aralap, Q.A.Iasaýı kesenesine zıarat jasady. Tarıhshylar men ǵalymdar jáne fılologtar «rýhanı jáne ǵylymı salalarǵa qoldaý kórsetý jalǵasyn tapsa, Túrkistannyń bolashaǵy jarqyn bolady» deı kele konferensıany joǵary deńgeıde uıymdastyrǵan Túrkistan jurtshylyǵyna rızashylyqtaryn bildirdi.
