«ارشا تريەۆەل» ىشكى تۋريزمگە جاۋاپتى تۋرفيرماسىنىڭ ديرەكتورى عاني نازاربەك وسىنداي پىكىر ءبىلدىردى.

— كەشە عانا ەكسپەديسيادان ورالىپسىزدار…
— سوزاق اۋدانى بويىنشا زەردەلەۋ جۇرگىزدىك. شەجىرەلى قاراتاۋ، سىرلى سوزاق، تەرەڭ تاريح تەرىسكەي دەيمىز عوي. تابيعاتقا، تاريحقا باي ولكە. ماقساتىمىز — ىشكى تۋريزمگە بارلاۋ، سەرۆيس، جولدارىن كورۋ بولدى. سونىمەن قوسا جاڭالىق تا اشتىق. تاريحتا كەزدەسپەگەن پەتروگليفتەر تابىلدى. ونىمەن ولكەتانۋشى و. گونچاروۆ اينالىسىپ جاتىر. ەكسپەديسيانىڭ ماقساتى ورىندالدى. الدا سوزاق اۋدانى بويىنشا تۋريستىك باعىتقا ەنەتىن بولادى.
— ەكسكۋرسوۆودتار جايلى ءسوز قوزعاساق. وڭتۇستىكتە كوپ پە؟
— ولكە تاريحىمەن تانىستىرۋشى ەكسكۋرسوۆودتار بار البەتتە، ءبىراق جەتكىلىكتى دەڭگەيدە دەپ ايتۋعا بولمايدى. ءقازاقتىلدى تانىستىرۋشىلار از. ىشكى تۋريزم دەپ شەتەلدەن كەلگەن ادامدى ىشكى تۋريزمگە جاتقىزۋعا بولمايدى. ونى كەلۋ ءتۋريزمى، بىزدەن باراتىنداردى شىعۋ ءتۋريزمى دەپ اتايمىز. ىشكى تۋريزم دەگەنىمىز قازاقستان ازاماتتارىنىڭ ىشكى تۋريستىك نىسانداردى اينالۋى. ولاردىڭ نەگىزگى بولىگى ءقازاقتىلدى ازاماتتار. نەگىزىندە ءقازاقتىلدى ەكسكۋرسوۆودتاردىڭ جەتىسپەۋشىلىگى بايقالادى.
— ەكسكۋرسوۆود جان — جاقتى بولۋى مىندەتتى مە؟
— ارينە، قازاقستاننىڭ تاريحىن تولىق ءبىلۋى، مەملەكەتتىك سيمۆولداردان باستاپ مەملەكەتتىڭ قۇرىلۋىن، تاريحىن، ەكونوميكاسىن، مادەنيەتىن، ساياسي جاعدايلارىن، اپاراتىن نىسانداردىڭ شارۋاشىلىعى، حالىقتىڭ تىنىس تىرشىلىگىن، جالپى بارلىق جاعىنان حاباردار بولۋى تالاپ ەتىلەتىن مىندەتتەردىڭ ءبىرى.
— وڭتۇستىكتە كوبىسى قاسيەتتى جەرلەرگە زيارات ەتۋگە كوپ بارادى. مالىمەتتى تولىق جەتكىزە الاتىن ەكسكۋرسوۆودتار بار ما؟
— ماماندار بار، ارينە. ازىرەت سۇلتان قورىق مۇراجايىنىڭ ماماندارى، ەكسكۋرسوۆودتارى، بىلىكتى ازاماتتار بار. اتتەگەن-ايى، دۇرىس اقپارات بەرمەيتىندەر دە بار. قاسيەتتى ورىنداردى ارالاعاندا تۇركىستاندا ەكى كۇن ءجۇرىپ قازاقتىڭ باي تاريحى ايتىلمايتىن كەزدەر دە بولادى. تۇركىستان قازاقتىڭ قايناپ جاتقان تاريحى عوي. ماسەلەن، وتىرارعا بارىپ تۇرىپ، ارىستان بابقا بارىپ قاسىنداعى وتىرار قالاسىنا كىرمەي كەتەمىز. ايتا بەرسەك، كەم كەتىك كوپ قوي…