بۇگىنگى كۇنى اۋەجاي تەرمينالىنىڭ ىرگەتاسى اياقتالىپ، ۇشۋ-قونۋ جولاعىنا قاجەتتى قۇمدى-شاعال تاستى قوسپانىڭ ءبىرىنشى قاباتى توسەلىنۋدە. سونداي-اق، رۋلدەۋ جولى مەن پەرروننىڭ جۇمىستارى اياقتالىپ وتىر.
اۋەجاي جالپى 900 گەكتار اۋماقتى قامتيتىن بولادى. وندا تەرمينال، ۇشۋ-قونۋ جولاعى جانە باسقا دا نىساندار سالۋ جوسپارلانعان. حالىقارالىق اۋەجاي 2020 جىلدىڭ سوڭىنا قاراي پايدالانۋعا بەرىلەدى دەپ كۇتىلۋدە.
«YDA Group» كومپانياسىنىڭ باسقارما ءتوراعاسى ارسلان حۋسەيننىڭ ايتۋىنشا، تۇركىستان حالىقارالىق اۋەجايى حالىقارالىق ستاندارتقا ساي جانە زاماناۋي قۇرىلىس تەحنولوگياسىمەن سالىنۋدا. تەرمينال جىلىنا 3 ميلليونعا جۋىق جولاۋشىعا قىزمەت كورسەتە الادى.
ايتا كەتەرلىگى، تۇركىستان قالاسىندا جاڭادان سالىنىپ جاتقان حالىقارالىق اۋەجايعا باراتىن اۆتوموبيل جولىنىڭ جالپى ۇزىندىعى – 16،3 شاقىرىم. اۋەجاي جولىن تولىعىمەن 2020 جىلدىڭ قىركۇيەك ايىندا اياقتاۋ كوزدەلۋدە.
تۇركىستان وبلىسى اكىمىنىڭ باسپا ءسوز قىزمەتى
