تاۋەلسىزدىك مەرەكەسى قارساڭىندا تۇركىستان وبلىسىنىڭ ارىس قالاسىندا «ماڭگىلىك ەل» ساياباعى مەن «قۇرمەتتى ازاماتتار» اللەياسى اشىلدى.

16 جەلتوقسان ەلىمىزدىڭ تاۋەلسىزدىك كۇنى بولعاندىقتان ساياباق ورتاسىنا بيىكتىگى 16 مەتر بولاتىن «ماڭگىلىك ەل» مونۋمەنتى ورناتىلعان.

جاسىل جەلەكپەن كومكەرىلگەن دەمالىس ورنىنىڭ قۇرىلىسىنا 79 ملن تەڭگە قارجى جۇمسالىپتى. ساياباقتىڭ اشىلعانىنا اۋدان حالقى ءدان ريزا.

سەبەبى، قالا ورتالىعىندا تازا اۋا مەن تىنىستاپ، الاڭسىز سەرۋەندەۋگە بولادى. جول جيەگىنە جايلى ورىندىقتار مەن اسەم شامدار ورناتىلعان.

ال «قۇرمەتتى ازاماتتار» اللەياسى دا قالا تۇرعىندارىنىڭ كوز قۋانىشىنا اينالدى. 47 ملن تەڭگە جۇمسالعان اللەيانىڭ كىرەبەرىس قاقپاسىنان باستاپ، اياق جولدارىنا دەيىن جاڭادان سالىنعان.

مۇندا اۋداننىڭ دامۋىنا ولشەۋسىز ۇلەس قوسقان ارىس قالاسىنىڭ قۇرمەتتى ازاماتتارىنىڭ ەسىمدەرى تاسقا قاشاپ جازىلعان.

«ولاردىڭ اتى-جوندەرىن بولاشاق ۇرپاق ءبىلىپ، ساناسىنا ءسىڭىرىپ ءوسۋى ءتيىس»، – دەيدى قالا تۇرعىندارى.

ورازحان ارىستانبايەۆ، ارىس قالاسىنىڭ قۇرمەتتى ازاماتى: - قۇرمەتتى ازاماتتاردىڭ تىزىمىندە قاراپايىم ەڭبەككەرلەر دە بار. ولاردىڭ ءبارى ءبىزدىڭ قالامىزدىڭ دامۋىنا، الەۋمەتتىك-ەكونوميكاسىنىڭ كوتەرىلۋىنە ۇلكەن ۇلەس قوسقان. ال ەندى «ماڭگىلىك ەل» ساياباعى ەلىمىزدى ماڭگىلىك ەلگە اينالدىرۋ جۇمىسى ءجۇرىپ جاتىر. مىنەكەي، سونىڭ ءبىر ايعاعى بۇگىنگى «ماڭگىلىك ەل» ساياباعىنىڭ اشىلۋى بولسا كەرەك.