تۇركىستان وبلىسى، تولەبي اۋدانىنداعى سىلبەلىتوبە 1 وبالى قورىمدارىندا وزبەكالى جانىبەكوۆ اتىنداعى ءوقپۋ-نىڭ ن.پ.پودۋشكين اتىنداعى ارحەولوگيا ورتالىعى جانە ورداباسى ۇلتتىق تاريحي-مادەني قورىعى قىزمەتكەرلەرىمەن بىرلەسە وتىرىپ، دالالىق قازبا جۇمىستارىن جۇرگىزدى، – دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.

ارحەولوگيالىق ەكسپەديسيا جەتەكشىسى ت.ع.د پروفەسسور ا.ن.پودۋشكين تاريحي-مادەني مۇرالارىمىزدى قورعاپ ءارى ساقتاپ قالۋ ماقساتىندا تۇركىستان وڭىرىندە ورنالاسقان قاڭلى كەزەڭىنە تيەسىلى ەسكەرتكىشتەردى زەرتتەپ، بىرنەشە جىلدان بەرى قازبا جۇمىستارىن جۇرگىزىپ كەلەدى.

قاسقاسۋ اۋىلى، سىلبەلى شاتقالىنداعى بارلاۋ جۇمىستارى بارىسىندا سىلبەلىتوبە 1 وبالى قورىمدارىندا جۇيەسىز 16 قورىم، 600 مەتر شىعىسقا قاراي سىلبەلىتوبە قونىسى ورنالاسقاندىعى انىقتالعان بولاتىن. قورىمداردىڭ ديامەترى 20 مەتر جانە بيىكتىگى 2 مەترگە دەيىن جەتەدى. 2019 جىلدان بەرى جۇرگىزىلگەن قازبا جۇمىسى بيىل جوسپارعا سايكەس №5،6 وبالارعا قازبا جۇمىستارى جۇرگىزىلدى.

وبانىڭ ءپىشىنى ءت-تارىزدى، ءدالىز تەرەڭدىگى ءۇش مەترگە دەيىن تومەنگە تۇسكەن جانە جەرلەۋ ورنىنىڭ كۇمبەزى بەسىككە ۇقساس كەلگەن. جەرلەۋ ورنى ب.ز.د. I عاسىرلارعا ءتان. مۇنى عالىمدار قاڭلى مەملەكەتىمەن بايلانىستىرادى.

قازبا جۇمىستارى بارىسىندا №5 وبادان بىرنەشە سۇيەك قالدىقتارى مەن قۇمىرانىڭ بولىكتەرى تابىلدى. كىرە بەرىسى 50-60 كگ بولاتىن  تاسپەن جابىلعان، ءبىراق انىقتالعانداي وبانىڭ ءوز زامانىندا تونالعانىن كورۋگە بولادى. ال №6 وبادا جۇرگىزىلگەن قازبا جۇمىستارى بارىسىندا ب.ز.د. I ع. – ب.ز. I ع. جاتاتىن تۇرمىستىق جاعدايدا پايدالانعان قۇمىرا، سونىمەن قاتار اعاشتان جاسالىنعان قورامساق ىشىنە سالىنعان 5 تەمىر جەبە ۇشتارى انىقتالدى. بۇدان بولەك  اۋىزدىقتى اسەمدەۋ ءۇشىن قولدانعان تىلشەلى توعا، اۋىزدىق جانە بەلدىك، اياق-كيىمنىڭ ايىلباس توعالارى تابىلدى.

سىلبەلىتوبە وبالى قورىمدارىندا جانە جالپى ەكى اشىلعان وبانىڭ بىرەگەيلىگى – ارحەولوگيالىق جاساقتا العاش رەت جوعارىدان قازبا تۇسىرمەيتىن ءادىستى قولدانىلىپ وتىر. ولاي جاسالعان سەبەبى توپىراق قۇرامى اق سۇر ءتۇستى قاتىپ قالعان سەمەنت قوسپاسى سياقتى بەرىك سازدان قۇرالعان. سونىمەن قوسا بۇنداي جەرلەۋ ورىندارىندا سول زامانداعى پايدالانىلعان قۇرال سايماننىڭ ءىزى دە ساقتالعان. ا.ن.پودۋشكيننىڭ جەتەكشىلىگىمەن وتكەن بيىلعى ارحەولوگيالىق قازبا جۇمىستارى ناتيجەلى بولدى. الداعى ۋاقىتتاردا قازبا جۇمىستارى جوسپارعا سايكەس ءوز جالعاسىن تاپپاق.