اتىراۋ وبلىسىنداعى ورتاعاسىرلىق سارايشىق قالاشىعى اۋماعىندا ارحەولوگتار شامامەن 250 جاڭا ارتەفاكت تاپتى. تابىلعان جادىگەرلەردىڭ اراسىندا التىن وردا ءداۋىرىنىڭ ەسكەرتكىشتەرىنەن بۇرىن كەزدەسپەگەن ەرەكشە زات بار، دەپ حابارلايدى Dalanews.kz «اق جايىققا» سىلتەمە جاساپ.
«سارايشىق» مەملەكەتتىك تاريحي-مادەني مۋزەي-قورىعىنىڭ ماماندارى قازبا جۇمىستارى بارىسىندا XIV عاسىردىڭ باسىنا جاتاتىن تۇرعىن ۇيلەردىڭ بولىكتەرىن، سيتادەل مەن كەرۋەن-سارايدىڭ قالدىقتارىن انىقتاعان.
مۋزەيدىڭ باس ينسپەكتورى ءارى ارحەولوگى ايبەك تۇرار ۇلىنىڭ ايتۋىنشا، قور كوللەكسياسى مەتالل، شىنى، سۇيەك جانە كەراميكادان جاسالعان بۇيىمدارمەن تولىققان. الايدا تابىلعان زاتتاردىڭ ىشىندە عىلىمي قاۋىمداستىقتىڭ ەرەكشە قىزىعۋشىلىعىن تۋدىرعان ءبىر جادىگەر بار.
«ەڭ ەرەكشە ولجا – XIV–XV عاسىرلارعا جاتاتىن قولا قۇلىپ. بۇعان دەيىن مۇنداي بۇيىمدار التىن وردا قالاشىقتارىنان تابىلعان ەمەس»، – دەدى ارحەولوگ.
سارايشىق – قازاقستانداعى ەڭ كونە قالالاردىڭ ءبىرى. ءارتۇرلى تاريحي كەزەڭدەردە بۇل قالا التىن وردا، نوعاي ورداسى جانە قازاق حاندىعىنىڭ استاناسى بولعان.
