تٷركٸستان وبلىسىنىڭ وتىرار اۋدانىندا ەيەل تٶرت بالاسىمەن بٸرگە ٸز-تٷزسٸز جوعالىپ كەتكەن. بۇل تۋرالى جۋرناليست گٷلميرا ەبٸقاي Instagram پاراقشاسىندا جازدى, دەپ حابارلايدى dalanews.kz.
تۋىستارىنىڭ ايتۋىنشا, 6 شٸلدەگە قاراعان تٷنٸ ۇلدانانىڭ جاعدايىن بٸلۋگە كەلگەن اناسى مەن ەنەسٸ ٷيدەن ەيەلدٸ دە, بالالاردى دا تاپپاعان. ونىڭ كٷيەۋٸ سول ۋاقىتتا ۆاحتالىق جۇمىستا بولعان.
جاقىندارى باستاپقىدا ەيەل بالالارىمەن تانىستارىنىڭ ٷيٸنە كەتكەن شىعار دەپ ويلاپ, كەلەسٸ كٷنگە دەيٸن كٷتكەن. الايدا حابار بولماعان سوڭ پوليتسيياعا ارىز بەرگەن.
"ەشكٸمگە زييانى جوق. اڭقاۋلىعىن پايدالانىپ, بٸرەۋلەر الداپ كەتتٸ مە دەپ الاڭدايمىز", – دەگەن تۋىستارى.
گٷلميرا ەبٸقاي بەس ادامنىڭ بٸرنەشە كٷن بويى تابىلماۋىنا الاڭداۋشىلىق بٸلدٸرٸپ, پوليتسييانى ٸزدەۋ جۇمىستارىن كٷشەيتۋگە شاقىردى.
"تٶرت بالاسىمەن جٷرگەن ەيەل كٶپشٸلٸكتٸڭ كٶزٸنە بٸردەن تٷسۋٸ كەرەك ەدٸ. الايدا التى كٷننەن بەرٸ ولاردى كٶرگەنٸن ايتقان ادام جوق. بارلىعى امان بولسا ەكەن", – دەپ جازدى ول.
