بۇگىن تۇركىستان وبلىسىنىڭ اكىمى جانسەيىت تۇيمەبايەۆتىڭ وكىمىمەن ق ر پرەزيدەنتى اكىمشىلىگىنىڭ جانە تۇركىستان قالالىق ءماسليحاتىنىڭ كەلىسىمىمەن تۇركىستان قالاسى اكىمى لاۋازىمىنا الىپبەك شارىپبەك ۇلى وسەربايەۆ تاعايىندالدى. وبلىس باسشىسى قالا اكتيۆىن وبلىس ورتالىعى بولىپ تۇركىستان قالاسىنىڭ بەكىتىلۋىمەن قۇتتىقتاپ، شاھار باسشىسىن تانىستىردى.

ءا.وسەربايەۆ 1961 جىلى تۋعان، ءبىلىمى جوعارى، ماماندىعى بويىنشا بىلىكتىلىگى ينجەنەر-حيميك-تەحنولوگ.  ەڭبەك جولىن 1983 جىلى قاراعاندى اسبەست-سەمەنت ونىمدەرىن شىعاراتىن زاۋىتىنىڭ ءماشينيستى رەتىندە باستاعان. 1986-2014 جىلدارى تۇركىستان قالاسى قۇرىلىس دەتالدارى مەن كونسترۋكسيالارى كومبيناتى زەرتحاناسىنىڭ ينجەنەرى، ماستەرى، ەكونوميستى، سەح باستىعى، باس ينجەنەرى، «قۋات سۋيندۋستريا» اق، «KazakhConstruction Industry» اق تۇركىستان قالاسى رۋداسىز ماتەريالدار كومبيناتى فيليالدارىنىڭ ديرەكتورى، تۇركىستان قالالىق ءماسليحاتى حاتشىسىنىڭ مىندەتىن ۋاقىتشا اتقارۋشى، تۇركىستان قالاسى قۇرىلىس ءبولىمىنىڭ مەڭگەرۋشىسى، كەنتاۋ، تۇركىستان قالالارى اكىمدەرىنىڭ ورىنباسارى، تۇركىستان قالاسىنىڭ اكىمى، وبلىستىق كاسىپكەرلىك جانە يندۋستريالدى-يننوۆاسيالىق دامۋ باسقارماسىنىڭ باسشىسى، وڭتۇستىك قازاقستان وبلىسى تۇركىستان قالاسىنىڭ اكىمى بولىپ لاۋازىمدارىن اتقارعان. 2017 جىلدىڭ جەلتوقسان ايىنان باستاپ وڭتۇستىك قازاقستان وبلىسى اكىمىنىڭ ءبىرىنشى ورىنباسارى لاۋازىمىندا قىزمەت ەتىپ كەلدى.

ءوڭىر باسشىسى جانسەيىت قانسەيىت ۇلى تاريحي ءارى سىندارلى كەزەڭدە تۇركىستان قالاسىنىڭ اكىمىنە جانە اكىمدىك قۇرىلىمدارىنا ارتىلاتىن جاۋاپكەرشىلىكتىڭ جۇگى اۋىر ەكەندىگىن جەتكىزدى.

«تۇركىستانعا «تەك قازاق ەلىنىڭ عانا ەمەس، بۇكىل تۇركى جۇرتىنىڭ زيارات جاسايتىن قاستەرلى ورنى» دەپ باعا بەرگەن ەلباسى ونىڭ رۋحاني ومىرىندە قوجا احمەت ياساۋي كەسەنەسىنىڭ ۇلكەن ورنى بار ەكەنىن، تاريحى تەرەڭ تۇركىستاننىڭ تۋريزم ءۇشىن دە ماڭىزدىلىعى ەرەكشە ەكەندىگىن جانە قالانىڭ توعىز جولدىڭ تورابىندا ورنالاسۋى سىرتقى جانە ىشكى تۋريستەر مەن جەرگىلىكتى تۇرعىندار ءۇشىن قولايلى ەكەندىگىن باسا ايتتى، دەمەك وسى مۇمكىندىكتەردى ءتيىمدى پايدالانۋ قاجەت»، - دەدى وبلىس اكىمى.

سونداي-اق،  قالا اكىمىنە تۇركىستان قالاسىنىڭ باس جوسپارىن تەزدەتىپ ازىرلەۋدى، زامان تالابىنا ساي قالانىڭ دامۋ ديناميكاسىن ودان ءارى ارتتىرۋعا قاجەتتى باعىتتاردى جەتىلدىرۋدى جانە تۇرعىندار مەن تۋريستەرگە قولايلى جاعداي جاساۋ ماقساتىندا قالانىڭ ينفراقۇرىلىمىن قالىپتاستىرۋدى تاپسىردى.

بۇدان وزگە، ءوڭىر باسشىسى جانسەيىت قانسەيىت ۇلى يندۋستريالدى ايماقتا ورنالاساتىن يننوۆاسيالىق-ينۆەستيسيالىق جوبالاردى كوپتەپ تارتۋ، شاعىن جانە ورتا بيزنەستى جەتىلدىرە وتىرىپ، ءوندىرىستى دامىتۋ، قالانىڭ لوگيستيكالىق مۇمكىندىگىن ارتتىرۋ، قالانى تۋريزم ورتالىعى رەتىندە دامىتۋ بويىنشا ناقتى شارالاردى قابىلداۋ قالا اكىمىنىڭ باستى ۇستانىمى بولۋى كەرەكتىگىن ايتتى.

– ەڭ باستىسى تۇركىستاندى ەلىمىزدىڭ رۋحاني تىرەگى ەكەندىگىن ۇمىتپاۋىمىز قاجەت. وسى تۇرعىدا بۇكىل تۇركى الەمى كوز تىككەن جاۋھار قالاداعى ءاربىر وتكىزىلگەن ءىس-شارالار مەن تاريحي وقيعالار ەگەمەن ەلىمىزدىڭ مەرەيى ەكەندىگى  ءارقاشاندا جادىمىزدا بولۋى ءتيىس، – دەپ تۇيىندەدى وبلىس اكىمى.

جيىن سوڭىندا ءوڭىر باسشىسى جانسەيىت تۇيمەبايەۆ تاريحي كەزەڭ توعىسىندا تۇركىستان وبلىسىنىڭ الەۋمەتتىك-ەكونوميكالىق دامۋىنا ۇلەس قوسىپ جۇرگەن ءبىر توپ بەلسەندى ازاماتتاردى ماراپاتتادى.