ستاتيستيكاعا سۇيەنسەك، جىل باسىنان بەرى وڭىردەگى كەدەن بەكەتتەرىنەن 350 مىڭنان استام كولىك پەن 17 ملن-داي ادام وتكەن.
بۇل جاعداي شەكارادا ورىن الاتىن زاڭبۇزۋشىلىقتاردىڭ دا كوبەيۋىنە اسەر ەتكەن سىڭايلى. ويتكەنى جىل باسىنان بەرى وڭىردەگى كەدەن بەكەتتەرىندە 514 اكىمشىلىك حاتتاما تولتىرىلىپ، 33 قىلمىستىق ءىس قوزعالعان. تۇركىستان وبلىستىق مەملەكەتتىك كىرىستەر دەپارتامەنتى ماماندارىنىڭ ايتۋىنشا، كەدەن بەكەتىندەگى زاڭبۇزۋشىلىقتىڭ كوبى تاۋار تاسىمالى كەزىندە ورىن الادى.
كوپ جاعدايدا تاسىمالداۋشىلار جالعان دەكلاراسيامەن شەكارا اسۋدى قالايدى. جۇك كولىكتەرىنە ەسىرتكى تيەپ وتەتىندەر دە كەزدەسەدى ەكەن. بيىل وسىنداي 32 جاعداي تىركەلگەن.
ال وتكەن ايدا جۇك ۆاگونىمەن ۇلكەن كولەمدە كەپتىرىلگەن جەمىستى الىپ وتپەك بولعاندار ۇستالعان.
دەپارتامەنت ماماندارىنىڭ ايتۋىنشا، سالىق تولەگىسى كەلمەيتىن كاسىپكەرلەر جالعان بانكروتتىق جاريالاۋعا كوشكەن. سونىمەن قاتار سالىق جيناۋشىلار ءوز بەرەشەگىن تولەمەي جۇرگەن ءبىراز بورىشكەردەن ماجبۇرلەپ وندىرگەن.
ەركىن ەلشىبەكوۆ، وبلىستىق مەملەكەتتىك كىرىستەر دەپارتامەنتى باسشىسىنىڭ ورىنباسارى:
- 2018 جىلى 11 ايدا ماجبۇرلەپ ءوندىرىپ الۋ نەگىزىندە جەكە تولەم ارقىلى 662،8 ملن تەڭگە وندىرىلگەن. ونىڭ ىشىندە بەرەشەكتى وتەۋ بويىنشا حابارلامالاردى وتەۋ بويىنشا 585،6 ملن تەڭگە، وتىنىمدەر ارقىلى 72،9 ملن تەڭگە، بورىشكەردىڭ وتىنىمدەرى ارقىلى 3،4 ملن تەڭگە.
وڭىردەگى كىرىستەر دەپارتامەنتىنىڭ بيىلعى جۇمىس جوسپارى 122 ملرد تەڭگە بولىپتى. الايدا وسىنداي بەلسەندى جۇمىستاردىڭ ناتيجەسىندە 129 ملرد تەڭگە قارجى ءوندىرىلىپ، ەل بيۋدجەتىنە قۇيىلعان.
