ۇستاز بەدەدى – مەملەكەت بەدەلى ەكەنىن اتاپ وتكەن ول بىلىكتى مامان، وتانشىل ازامات تاربيەلەۋ ءۇشىن مۇعالىمدەردىڭ ءبىلىمى مەن قايراتى مول بولۋ كەرەكتىگىن ايتتى. وبلىستا تۇلەپ ۇشىپ، وزگە وڭىرلەردە قىزمە ەتىپ جۇرگەن بىلىكتى ماماندار مەن پەداگوگتاردى تۋعان جەرگە شاقىرۋ كەرەكتىگىن جەتكىزدى.
وسى جيىندا جانسەيىت تۇيمەبايەۆ تۇركىستان وبلىسىندا ۇستازدار قاۋىمىنا مەملەكەت تاراپىنان الەۋمەتتىك قولداۋ كۇشەيتىلەتىنىن اتاپ ءوتتى. ماسەلەن، بيىلعى قىركۇيەك ايىنان باستاپ ۇلتتىق بىلىكتىلىك تەستىلەۋدەن وتكەن 4200 پەداگوگتىڭ ايلىق جالاقىسى ساناتتارىنا قاراي 30-50 پايىزعا ارتادى. وعان وبلىستىق بيۋدجەتتەن 1 ملرد. 67 ملن. تەڭگە قارالدى. بيىل جاڭارتىلعان ءبىلىم بەرۋ مازمۇنىمەن ساباق بەرىپ جاتقان 32 مىڭنان استام ۇستازعا 30 پايىز جالاقى قوسىلدى. وعان بيۋدجەتتەن 10 ملرد. 290 ملن. تەڭگە قارالعان.
– وبلىسىمىز تۇركىستان وبلىسى بولىپ اتالىپ، وبلىس ورتالىعىنىڭ تۇركىستان قالاسىنا كوشۋى دە ۇستازدارعا وڭ اسەرىن تيگىزىپ جاتىر. ەگەردە، سىزدەر تۇركىستان قالاسىنا كەلگەن جاعدايدا ايلىق جالاقىلارىڭىزعا 20 پايىز قوسىمشا اقى، ەڭبەك دەمالىستارىڭىزعا 7 قوسىمشا كۇن، ەڭبەك دەمالىستارىڭىزعا 1 ايلىق قوسىمشا ساۋىقتىرۋ اقىسى قوسىلادى. الەۋمەتتىك سالا قىزمەتكەرلەرى مەن ۇستازدار قاۋىمى ءۇشىن تۇركىستان وبلىسىنىڭ 13 اۋدانىندا ينۆەستورلار ەسەبىنەن 14 مىڭ شارشى مەترلى 31 تۇرعىن ءۇي سالىنىپ جاتىر، – دەدى وبلىس اكىمى.
بۇگىندە تۇركىستان وبلىسىندا كاسىپتىك ءبىلىم ساپاسىن كوتەرۋ ماسەلەسىنە اكىمدىك تاراپىنان نازار اۋدارىلا باستادى. ءوڭىرىمىزدىڭ الەۋمەتتىك-ەكونوميكالىق دامۋى ءۇشىن ماڭىزدى سالانىڭ ءبىرى – تەحنيكالىق جانە كاسىپتىك ءبىلىم بەرۋ. سەبەبى، كاسىپتىك ءبىلىم مەكەمەلەرىن ءبىتىرۋشى تۇلەكتەردىڭ 25-30 پايىزى جۇمىسپەن قامتاماسىز ەتىلمەي كەلەدى. ول مەملەكەتتىك تاپسىرىستى دۇرىس قالىپتاستىرماۋدان. قوعامعا ناقتى قانداي ماماندار قاجەت ەكەنى ءجىتى زەرتتەلمەگەندىكتەن جاستاردىڭ ءبىرازى ديپلومعا ساي جۇمىس تاپپاي ءجۇر. وسى ولقىلىقتى جويۋ ماقساتىندا بيىل كاسىپتىك مامان دايارلاۋ باعىتىندا مەملەكەتتىك تاپسىرىستى جۇيەلەۋ ءۇشىن 7 جۇمىسشى توپ قۇرىلعان. جۇمىسشى توپ قوعامعا اسا قاجەتتى ماماندىقتاردى سارالاعان. وسى جاڭا فورمات بويىنشا بيىل وڭىرگە قاجەتتى ماماندار دايارلانادى، جۇمىسسىزدار سانى ازايىپ، مەملەكەت قارجىسى ءتيىمدى ماقساتتا جۇمسالادى. بيىل مەملەكەتتىك تاپسىرىسقا رەسپۋبليكادان 3 ملرد. 900 ملن. تەڭگە ال، وبلىستان 17 ملرد. تەڭگە قارالدى. ناقتى قادام ارقىلى كاسىپتىك ءبىلىمنىڭ ساپاسى كوتەرىلىپ، وبلىس ەكونوميكاسىنا قاجەتتى ماماندار تاپشىلىعى ماسەلەسى دە شەشىلمەك.
تۇركىستان وبلىسىنىڭ مۇعالىمدەرى ءۇشىن تاعى ءبىر جاعىمدى جاڭالىق بار. بيىل ءبىرىنشى رەت ءوڭىر ۇستازدارىنا م.لومونوسوۆ اتىنداعى ماسكەۋ مەملەكەتتىك ۋنيۆەرسيتەتىنىڭ ماگيستراتۋراسىنا 20 گرانت ءبولىندى. ولار ءۇش ماماندىق بويىنشا الەمدەگى ەڭ اتاقتى وقۋ ورىندارىنىڭ بىرىندە ءبىلىمىن جەتىلدىرىپ قايتادى. يگى ىسكە وبلىس بيۋدجەتىنەن قارجى قاراستىرىلعان. سونىمەن قاتار، قازىعۇرت اۋدانىندا ورنالاسقان ج.قاپپاروۆ اتىنداعى فيزيكا-ماتەماتيكا باعىتىندا وقىتاتىن مامانداندىرىلعان مەكتەپ-ينتەرناتىنا شەتتەن كەلگەن مۇعالىمدەرى ءۇشىن 15 جەكە ءۇي قۇرىلىسىن سالۋ ءۇشىن قۇجاتتار دايىندالىپ جاتىر. اتالعان باستامالار تۇركىستان وبلىسىندا ءبىلىم سالاسىنا سەرپىلىس اكەلەدى دەگەن سەنىم بار.
تۇركىستان وبلىسى اكىمىنىڭ باسپا ءسوز قىزمەتى
