تۇركىستان وبلىسىندا ءوڭىر باسشىسى دارحان ساتىبالدىنىڭ تاپسىرماسىنا سايكەس كەزەكتى سەنبىلىك ۇيىمداستىرىلدى. «تازا قازاقستان» اكسياسى اياسىندا وتكەن اۋقىمدى شاراعا جەرگىلىكتى اكىمدىكتەر، بارلىق مەملەكەتتىك مەكەمە مەن كاسىپكەرلىك ۇيىمدار، بەلسەندىلەر مەن ەرىكتىلەر قاتىسىپ، بەكىتىلگەن اۋماقتاردا تازالىق جانە اعاش كوشەتتەرىن ەگۋ جۇمىستارى جۇرگىزىلدى، دەپ حابارلايدى Dalanews.kz تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
«سەنبىلىك – تازالىق ايناسى» اتتى تاقىرىپتا بارلىق اۋدان، قالاداعى جاستار ورتالىقتارى دا اتسالىستى.
سەنبىلىكتىڭ ماقساتى – قورشاعان ورتانى تازا ۇستاۋعا، ەكولوگيالىق تازالىقتى ساقتاۋعا اتسالىسۋ تۋعان جەرگە دەگەن سۇيىسپەنشىلىكتەرىن وياتۋ. سونىمەن قاتار ءاربىر ازامات وبلىسىمىزدىڭ تازالىعى مەن كوركەيۋىنە ۇلەس قوسۋ. سونداي-اق اۋدان، قالا كوشەلەرىندەگى تازالىقتى ساقتاۋ جانە ەكولوگيالىق مادەنيەتتى قالىپتاستىرۋ ماسەلەلەرىنە قوعام نازارىن اۋدارتۋعا باعىتتالعان.
اتقارىلعان جۇمىستاردىڭ ناتيجەسىندە ءبىر جارىم مىڭداي كوشە بويى تازالاندى. 850 توننا قوقىس شىعارىلدى. بۇدان بولەك اعاشتار اكتەلىندى، اياق جولدارى قوقىستان تازارتىلدى. ساياباقتار جانە سكۆەرلەر، بالالار جانە سپورت الاڭشالارى رەتكە كەلتىرىلدى. كوپىرلەر، وزەندەر، كانالدار مەن بۇلاقتاردىڭ ارنالارى جينالدى. كوپ قاباتتى تۇرعىن ءۇي ماڭىنداعى اۋماقتارى مەن اۋلالارىن، جەرتولەلەرىن، كىرە بەرىستەرى (پودەزد) تازارتىلدى. ءۇي قاسبەتتەرىنە اكتەۋ جانە سىرلاۋ جۇمىستارى جۇرگىزىلدى. 145 مىڭعا جۋىق اعاش جانە بۇتا وتىرعىزىلدى. جالپى ون بەس مىڭداي ادام سەنبىلىككە قاتىسىپ، 239 تەحنيكا جۇمىلدىرىلدى.
قورشاعان ورتانىڭ تازالىعىنا جاۋاپكەرشىلىكپەن قاراۋ – ءاربىر ازاماتتىڭ باستى مىندەتى. ءاربىر تۇرعىن ءوزى تۇراتىن ءۇيدىڭ اۋلاسىن تازا ۇستاسا، بۇل ولاردىڭ ءوڭىر تازالىعىنا قوسقان ۇلەسى.
