– بيىلعى جىلدىڭ العاشقى توقسانىندا مەملەكەتتىك بيۋدجەت جوسپارى 108% ورىندالدى. جەرگىلىكتى بيۋدجەتتىڭ وسى جىلعا ارنالعان جوسپارى بويىنشا ناقتى ءتۇسىم 33 ملن تەڭگەنى قۇراپ، تۇسىمدەردىڭ ءوسۋ قارقىنى 140%-عا جەتتى. مەملەكەتتىك قىزمەتتەردىڭ ساپاسىن ارتتىرۋ ءۇشىن وبلىس اۋماعىندا 17 ايماقتىق باسقارما، كەدەن بەكەتتەرىندە جۇمىس ىستەيتىن 7 قىزمەت كورسەتۋ ورتالىقتارى دەپارتامەنت تاراپىنان ۇنەمى قاتاڭ باقىلاۋدا. بارلىق ورتالىقتاردا «كەڭەس بەرۋ تەرەزەسى» بار، – دەدى ەركىن كەڭەسبەك ۇلى.
قازىرگى تاڭدا مەملەكەتتىك كىرىستەر دەپارتامەنتى اكىمشىلىك كەدەرگىلەردى ازايتۋ ءۇشىن جانە تۇرعىندارعا قولايلى جاعداي جاساۋ ماقساتىندا ەلەكتروندى سەرۆيستەردىڭ اياسىن كەڭەيتۋدە. ماسەلەن، ازاماتتار اراسىندا «E-Salyq azamat»، «E-salyq Business» ءموبيلدى قوسىمشالارى تانىمال بولا باستادى. وتكەن جىلى وبلىستىڭ 100 مىڭنان استام تۇرعىنى جانە 583 جەكە كاسىپكەر ءموبيلدى قوسىمشالاردىڭ كومەگىنە جۇگىنگەن. ءموبيلدى قولدانبادا ونلاين برونداۋ، ارتىق تولەمدەردى باسقارۋ، سالىق تولەمدەرىن قاراۋ جانە تولەۋ مۇمكىندىكتەرى قاراستىرىلعان.
