تۇركىستان وبلىسىنىڭ اكىمدىگى الەۋمەتتىك جەلىلەردە تاراعان، كەلەس اۋدانىندا قۋاڭشىلىق سالدارىنان ءتورت تۇلىكتىڭ قىرىلىپ جاتقانى تۋرالى اقپاراتتى جوققا شىعاردى،- دەپ حابارلايدى Dalanews.kz
الەۋمەتتىك جەلىدە كەيبىر قولدانۋشىلار وڭىردە اپتاپ ىستىقتىڭ سالدارىنان ونداعان مالدىڭ قىرىلعانىن ايتىپ، جاعدايدىڭ ۋشىعىپ تۇرعانىن العا تارتقان بولاتىن. الايدا بۇل اقپاراتتى وبلىستىق اكىمدىكتىڭ باسپا ءسوز قىزمەتى رەسمي تۇردە جوققا شىعاردى.
"تۇركىستان وبلىسىندا قۋاڭشىلىق پەن شەگىرتكەنىڭ شابۋىلىنا بايلانىستى مالدىڭ قىرىلۋ دەرەكتەرى تىركەلگەن جوق. بۇگىنگى تاڭدا جەم-شوپ بازاسىنا قاتىستى جاعداي تولىق باقىلاۋدا. قۋاڭشىلىققا قاتىستى مالىمەتتەر دە بۇرمالانعان. ماۋسىم ايىنىڭ باسىنداعى انومالدى ىستىققا قاراماستان، ەگىس القاپتارىنىڭ باسىم بولىگىندە، اسىرەسە تامشىلاتىپ جانە جەراستى سۋارۋ جۇيەلەرى ەنگىزىلگەن ايماقتاردا، ىلعال قورى جەتكىلىكتى دەڭگەيدە ساقتالعان. اۋىل شارۋاشىلىعى تاۋارىن وندىرۋشىلەرمەن بىرلەسە وتىرىپ، جەرگىلىكتى اتقارۋشى ورگاندار سۋارۋ كوزدەرىن ءارتاراپتاندىرۋ جانە مال ازىعىن الدىن الا دايىنداۋ بويىنشا شارالار قابىلدادى"، - اكىمدىك حابارلاماسىندا.
اكىمدىكتىڭ مالىمەتىنشە، رەسپۋبليكالىق وڭدەۋ جوسپارى اياسىندا تۇركىستان وبلىسىندا 700 مىڭ گەكتاردان استام اۋماق شەگىرتكەگە قارسى وڭدەلدى. زيانكەستەرگە قارسى مونيتورينگ جانە كۇرەس جۇمىستارى جالعاسۋدا. الەۋمەتتىك جەلىلەردە تاراپ جاتقان «جاپپاي شەگىرتكە شابۋىلى» تۋرالى ۆيدەوماتەريالدار شىنايى جاعدايدى كورسەتپەيدى جانە كوبىنە باسقا وڭىرلەردە نەمەسە شەت ەلدەردە تۇسىرىلگەن.
"جەرگىلىكتى بيلىك وكىلدەرى فەرمەرلەرمەن ۇنەمى بايلانىستا. ءاربىر ناقتى ءوتىنىش بويىنشا جەرگىلىكتى جەرگە بارىپ، جاعداي زەردەلەنەدى، قاجەتتىلىك تۋىنداعان جاعدايدا كومەك كورسەتىلەدى – بالامالى جايىلىمدار ۇسىنۋ، ءشوپتى بەلگىلەنگەن باعامەن ساتاتىن ورىندار ۇيىمداستىرۋ، لوگيستيكالىق قولداۋ كورسەتۋ جانە تاعى باسقا شارالار جۇزەگە اسىرىلۋدا"، - دەدى اكىمدىكتە.
تۇركىستان وبلىسىنىڭ اكىمدىگى تۇرعىنداردى جالعان اقپارات تاراتۋدان ساق بولۋعا جانە تەك رەسمي دەرەككوزدەرگە سۇيەنۋگە شاقىردى.
