تۇركىستان وبلىسى سارىاعاش اۋدانى جىبەك جولى اۋىلىندا بەس جاسار قىزدى زورلاعان ەر ادامعا جەڭىل ۇكىم شىعارعان سۋديا جۇمىسىنان كەتتى، - دەپ حابارلايدى Dalanews.kz.
سارىاعاش اۋداندىق سوتىنىڭ سۋدياسى بولعان نۇرعازى شەتەنوۆ قىزمەتىنەن كەتكەنى تۋرالى بۇيرىققا پرەزيدەنت قول قويعان. قۇجاتتا نۇرعازى شەتەنوۆ "تارتىپتىك تەرىس قىلىق جاساعانى ءۇشىن" سوت ءجيۋريىنىڭ شەشىمى بويىنشا قىزمەتىنەن بوساتىلعانى ايتىلعان.
نۇرعازى شەتەنوۆ بۇعان دەيىن وتستاۆكاعا كەتكەن بولاتىن. شەتەنوۆ ناقتى قانداي سەبەپكە بايلانىستى وتستاۆكاعا كەتۋ تۋرالى ءوتىنىش جازعانى بەلگىسىز.
ايتا كەتەيىك، بىلتىر شىلدەدە جوعارعى سوتتاعىلار شەتەنوۆ سوت ءتوراعاسى قىزمەتىنەن كەتەتىنىن ايتىپ سەندىرگەن بولاتىن. ارتىنشا ول ءبىر جارىم ايدان كەيىن تەكسەرىس جۇرگىزىلگەننەن كەيىن عانا قىزمەتىنەن كەتۋگە ءوتىنىش بەرگەنى بەلگىلى بولدى.
كۇدىكتىگە بۇعان دەيىن قانداي جەڭىل جازا بەرىلگەن ەدى؟
شەتەنوۆ ۇكىم شىعارعان كۇدىكتى بۇرىن ادام ولتىرگەنى ءۇشىن 2006 جىلى 10 جىلعا باس بوستاندىعىنان ايىرىلعان بولاتىن. كەيىننەن كۇدىكتى جازاسىن وتەپ بىتكەننەن كەيىن 2023 جىلعى مامىردا ىشىمدىك ءىشىپ وتىرىپ، اۋىلداسىمەن جانجالداسقان سوڭ، ونى بالتامەن ۇرعانى بەلگىلى بولدى. ال سۋديا كۇدىكتىنىڭ جابىرلەنۋشىمەن تاتۋلاسقانىن، بۇرىن سوتتىلىعىنىڭ جويىلعانىن ەسكەرە وتىرىپ، وعان پروباسيالىق باقىلاۋ بەلگىلەۋمەن 3 جىل باس بوستاندىعىن شەكتەۋ تاعايىنداعان ەدى.
كەيىننەن ەر ادام 2023 جىلدىڭ مامىرىندا تۇركىستان وبلىسىندا بەس جاسار قىزدى ءولتىردى جانە زورلادى دەگەن كۇدىككە ءىلىندى. بىلتىر 7 قىركۇيەكتە شىمكەنتتە 48 جاستاعى كۇدىكتىگە ۇكىم شىعارىلدى. سوت ونى 5 جاسار قىزدى ولتىرگەنى ءۇشىن كىنالى دەپ تانىپ، ءومىر بويىنا باس بوستاندىعىنان ايىرۋ جازاسىن تاعايىندادى. سوتتالعان ادام قاۋىپسىزدىگى ەڭ جوعارى كولونيادا جازاسىن وتەپ جاتىر.
