جوبادا وقۋ ءۇشىن قاتىسۋشىلار جەكە باسىن كۋالاندىراتىن قۇجاتتىڭ كوشىرمەسىن قوسا بەرە وتىرىپ، حالىقتى جۇمىسپەن قامتۋ ورتالىقتارىنا وقۋعا وتىنىممەن جۇگىنۋى قاجەت. ورتالىق ۇمىتكەر مارتەبەسى راستالعان كەزدە وقىتۋعا جولداما بەرەدى. ۇمىتكەرلەر قازىردەن https://atameken.co سايتىندا ءوز بەتىنشە ەلەكتروندىق-سيفرلىق قولتاڭبا ارقىلى تىركەۋدەن وتە الادى نەمەسە وڭىرلىك پالاتا جانىنداعى كاسىپكەرلەرگە قىزمەت كورسەتۋ ورتالىقتارى مەن ونىڭ اۋداندىق فيليالدارىنا جۇگىنۋ كەرەك.
تۇركىستان وبلىسى كاسىپكەرلەر پالاتاسىنىڭ ديرەكتورى تيمۋر ناقىپبەكوۆتىڭ ايتۋىنشا، وقىتۋ كۋرسى بىرنەشە كەزەڭنەن تۇرادى. قاتىسۋشىلارعا توپتاردا پراكتيكالىق وقىتۋ، بيزنەس-جوبانى تانىستىرۋعا دايىندىق جۇرگىزىلەدى.
بيىل ەلدەگى كۇردەلى ەپيدەميولوگيالىق جاعدايعا بايلانىستى كۋرس وتكەن جىلداعىداي ونلاين-فورماتتا وتەدى. وقۋعا جۇمىسسىزدار، ەڭبەككە جارامدى مۇگەدەكتەر، جاستار، از قامتىلعان جانە كوپبالالى وتباسىلاردىڭ مۇشەلەرى، زەينەت جاسىنا جەتپەگەن اۋىلشارۋاشىلىق كووپەراتيۆتەرىنىڭ مۇشەلەرى، شارۋا مەن فەرمەرلىك قوجالىقتار، قونىس اۋدارعاندار جانە قانداستار قاتىسا الادى.
ايتا كەتۋ كەرەك، مەملەكەتتىك قىزمەتكەرلەر كاسىپكەرلىك قىزمەتپەن اينالىسا المايدى، سايكەسىنشە كۋرسقا قاتىسپايدى. سونىمەن قاتار، بالا كۇتىمىمەن دەمالىستا جۇرگەن انالار مەن ورتا ارنايى وقۋ ورىندارى مەن جوو ستۋدەنتتەرى دە كۋرسقا قاتىسا المايدى. تولىق اقپارات الۋ ءۇشىن تۇركىستان وبلىسى ءۇشىن +7 72533 5-98-98 بايلانىس ءنومىرى جۇمىس ىستەيدى.
