Túrkistan oblysynda «Bastaý bıznes» jobasy boıynsha oqytý jumystary sáýir aıynyń 26-nan bastalady. Bıyl kásipkerlik negizderine tegin oqytýdan óńirdiń 3 650 turǵyny óte alady. Kýrs ótken jyldaǵydaı «Atameken Academy» onlaın-platformasy arqyly qashyqtyqtan oqytyady, – dep habarlaıdy Dalanews.kz Túrkistan oblysynyń Óńirlik komýnıkasıalar qyzmetine silteme jasap.

Jobada oqý úshin qatysýshylar jeke basyn kýálandyratyn qujattyń kóshirmesin qosa bere otyryp, halyqty jumyspen qamtý ortalyqtaryna oqýǵa ótinimmen júginýi qajet. Ortalyq úmitker mártebesi rastalǵan kezde oqytýǵa joldama beredi. Úmitkerler qazirden https://atameken.co saıtynda óz betinshe elektrondyq-sıfrlyq qoltańba arqyly tirkeýden óte alady nemese óńirlik palata janyndaǵy Kásipkerlerge qyzmet kórsetý ortalyqtary men onyń aýdandyq fılıaldaryna júginý kerek.

Túrkistan oblysy kásipkerler palatasynyń dırektory Tımýr Naqypbekovtyń aıtýynsha, oqytý kýrsy birneshe kezeńnen turady. Qatysýshylarǵa toptarda praktıkalyq oqytý, bıznes-jobany tanystyrýǵa daıyndyq júrgiziledi.

Bıyl eldegi kúrdeli epıdemıologıalyq jaǵdaıǵa baılanysty kýrs ótken jyldaǵydaı onlaın-formatta ótedi. Oqýǵa jumyssyzdar, eńbekke jaramdy múgedekter, jastar, az qamtylǵan jáne kópbalaly otbasylardyń músheleri, zeınet jasyna jetpegen aýylsharýashylyq kooperatıvteriniń músheleri, sharýa men fermerlik qojalyqtar, qonys aýdarǵandar jáne qandastar qatysa alady.

Aıta ketý kerek, memlekettik qyzmetkerler kásipkerlik qyzmetpen aınalysa almaıdy, sáıkesinshe kýrsqa qatyspaıdy. Sonymen qatar, bala kútimimen demalysta júrgen analar men orta arnaıy oqý oryndary men JOO stýdentteri de kýrsqa qatysa almaıdy. Tolyq aqparat alý úshin Túrkistan oblysy úshin +7 72533 5-98-98 baılanys nómiri jumys isteıdi.