تۇركىستان وبلىسىندا اسا ماڭىزدى ءارى ەلدىڭ ەكونوميكاسىن كوتەرەتىن جوبالار جۇزەگە اسىرىلىپ جاتىر. ولاردىڭ قازىرگى جاي-كۇيى قانداي؟ قانداي ماسەلەلەرى بار؟ وڭىرلىك ينۆەستيسيالىق شتابتىڭ كەزەكتى ماجىلىسىندە وسى تۇيتكىلدەر تارقاتىلدى. جيىندى وبلىس اكىمىنىڭ ورىنباسارى نۇرالحان كوشەروۆ جۇرگىزىپ، جوبالاردىڭ جاعدايىمەن تانىستىردى. تۇركىستان وبلىسىنىڭ اكىمى دارحان ساتىبالدى ءاربىر ينۆەستوردىڭ پىكىرىن، ۇسىنىسىن تىڭداپ، جاۋاپتىلارعا ءتيىستى تاپسىرمالار بەردى، دەپ حابارلايدى Dalanews.kz. تۇركىستان وبلىسى اكىمىنىڭ باسپا ءسوز قىزمەتىنە سىلتەمە جاساپ.
– اۋدان، قالا اكىمدەرى مەن باسقارما باسشىلارى ينۆەستيسيا تارتۋ باعىتىندا بەلسەندىلىكتى ارتتىرسىن. ىزدەنىڭىزدەر. ينۆەستيسيا تارتۋ، ءوندىرىس جانە جۇمىس ورىندارىن اشۋ – باستى مىندەتىمىز. جۇمىستى كۇشەيتىڭىزدەر. كاسىپكەرلەرمەن، ينۆەستورلارمەن اقىلداسىڭىزدار. ەكىنشىدەن، جەردى الىپ، جۇمىسىن ۋاقتىلى باستاماعان ينۆەستورلارعا دا زاڭ شەڭبەرىندە شارا كورىلسىن. جەر بەرىلگەن سوڭ جوبالار ءوز ۋاقىتىندا جۇزەگە اسۋى كەرەك، – دەدى دارحان ساتىبالدى.
ينۆەستيسيالىق شتاب وتىرىسىندا 14 جوبانىڭ جاي-كۇيى تالقىلاندى. سول جوبالار جۇزەگە اساتىن ايماقتىڭ اكىمدەرى مەن ينۆەستورلاردىڭ ەسەپتەرى، ۇسىنىستارى تىڭدالدى.
تۇركىستان وبلىسىندا درون شىعاراتىن، ينتەگراسيالانعان جىلىتۋ جۇيەلەرىنە ارنالعان جابدىقتار وندىرەتىن زاۋىتتار سالۋ جۇمىسى جۇرۋدە. وسىمدىك مايىن شىعاراتىن زاۋىت سالۋ جوباسى دا ۇسىنىلعان. بۇل جوبالار ساۋران اۋدانى مەن ارىس قالاسىندا جۇزەگە اسادى. سونىمەن بىرگە كەنتاۋ مەن تۇركىستاندا گاز قازاندىقتارى مەن تۇرمىستىق تەحنيكا وندىرەتىن زاۋىت قۇرىلىسى دا جۇرگىزىلمەك. جوبانىڭ 1-كەزەڭى بويىنشا «كەنتاۋ» ارنايى-ەكونوميكالىق اۋماعىنداعى بۇرىنعى ەكسكاۆاتور زاۋىتىنىڭ قولدانىستاعى عيماراتىنا كۇردەلى جوندەۋ جۇرگىزىلۋدە. 2-كەزەڭىڭ ىسكە اسىرۋ بويىنشا «TURAN» ارنايى-ەكونوميكالىق اۋماعىنان 4 گا جەر ءبولۋ كوزدەلىپ وتىر.
سايرام اۋدانىنداعى «پگۋ تۋركەستان» ءجشس-نىڭ بۋ-گاز قوندىرعىسىنىڭ قۇرىلىس بارىسى مەن «كازاحستانسكيە كوممۋنالنىە سەتي» ءجشس-نىڭ گاز تۋربينالى ەلەكتر ستانسياسىن سالۋ جانە جەل ەلەكتر ستانسياسىن سالۋ جوبالارى دا تالقىلاندى. جوبانى ۋاقتىلى اياقتاۋ قاجەتتىگى ەسكەرتىلدى.
تۇلكىباس اۋدانىنداعى «Beibars-Bottlers» ءجشس-نىڭ اۋىز سۋ جانە ءتۇرلى-تۇستى سۋسىندار ءوندىرۋ زاۋىتىنىڭ قۇرىلىسى اياقتالعان. قازىرگى تاڭدا قۇرال-جابدىقتارىنا شەف-مونتاجداۋ جۇمىستارى جۇرگىزىلىپ، جوبانى ىسكە قوسۋعا قاجەتتى ەلەكتر ەنەرگياسى ماسەلەسىن شەشۋ كۇتىلىپ وتىر. ماقتاارالداعى «GLOBAL TEXTILE TURKESTAN» ءجشس-نىڭ توقىما كلاستەرىن قۇرۋ جوباسىن ىسكە اسىرۋ بارىسى دا زەردەلەندى. بۇگىندە اتالعان كومپانيانىڭ كومەگىمەن جوعارى سۇرىپتى ماقتا ەگىلگەن، ءتۇسىم ويداعىداي.
ماجىلىستە وسى جانە وزگە دە جوبالار تالقىلانىپ، جاۋاپتىلارعا ءتيىستى تاپسىرمالەر بەرىلدى. تۇركىستان وبلىسىندا زاۋىتتار سالۋ، ءوندىرىس ورىندارىن اشۋ جۇمىستارى جالعاسادى.
