تٷركٸستان وبلىسىندا 1 مىڭ 800 گەكتار جەرگە تامشىلاتىپ سۋارۋ جٷيەسٸ ەنگٸزٸلگەن
قازىعۇرت اۋدانىنداعى ەڭ ٸرٸ ەت ەكسپورتتاۋشى شارۋاشىلىق بٸر جىلدا 12 مىڭ باس ٸرٸ قارا بورداقىلايدى. بيىلدىڭ ٶزٸندە يران مەن ٶزبەكستانعا 2 مىڭ توننا ەت ساۋدالاپ ٷلگەرگەن. اگرو سالاعا جاسالاتىن مەملەكەتتٸك قولداۋ ەندٸ شارۋاشالىق جۇمىسىنىڭ اياسىن كەڭەيتۋگە مٷمكٸندٸك تۋىپ وتىر. سەرٸكتەستٸك باسشىلارى سونى پايدالانىپ, تاعى 10 مىڭ ٸرٸ قارا بورداقىلايتىن كەشەن قۇرىلىسىن باستاعان.
– بٷگٸنگٸ جولداۋدا «2020 باعدارلاماسىن» 2025 جىلعا دەيٸن سوزۋ تۋرالى ايتىلدى. بۇل بٸزگە ٷلكەن قولداۋ دەپ ەسەپتەيمٸن. بۇدان باسقا جەڭٸلدەتٸلگەن نەسيە بەرۋ, ٶنٸمٸن ەكسپورتقا شىعارىپ جاتقان شارۋالاردى قولداۋ جالعاساتىن بولدى. ەلباسىنىڭ بۇل باستاماسى كەسٸبٸمٸزدٸ دامىتۋعا سەپتٸگٸن تيگٸزەتٸنٸ انىق, – دەيدٸ شارۋا قوجالىعىنىڭ تٶراعاسى سىرىم ەرتاەۆ.
بٷگٸندە ەلٸمٸزدەگٸ اۋىل شارۋاشىلىعى سالا ينۆەستيتسييا مەن جاڭا تەحنولوگيياعا مۇقتاج ەكەنٸ بەلگٸلٸ. الداعى ۋاقىتتا تٷركٸستان وبلىسىنىڭ شارۋالارى تامشىلاتىپ سۋارۋ, گيدروپونيكا, جەر استى سۋلارىن پايدالانۋ تەحنولوگييالارىن قولدانۋعا ۇمتىلۋدا. ٶيتكەنٸ جولداۋدا پرەزيدەنت وسى جايتتاردى اشىپ ايتقانى بەلگٸلٸ.
– تٷركٸستان وبلىسىندا تامشىلاتىپ سۋارۋ, جىلىجايلار, قارقىندى باۋلار, سونىمەن قاتار مال بورداقىلاۋ الاڭدارى, سٷت جيناۋ بەكەتتەرٸن ورناتۋ, سونداي-اق اسىل تۇقىمدى ٸرٸ قارانى 2,5 ەسەگە كٶبەيتۋ كٶزدەلٸپ وتىر, – دەپ وبلىستىق اۋىلشارۋاشىلىعى باسقارماسىنىڭ باسشىسى ن.بادىراقوۆ ماڭىزدى مٸندەتتەردٸ قولعا العاندارىن تٸلگە تيەك ەتتٸ.
بٷگٸندە تٷركٸستان اگرارلىق سالادا تيٸمدٸ تەحنولوگييالاردى كەڭٸنەن پايدالانىپ كەلە جاتقان ٶڭٸر بولىپ تابىلادى. قازٸر ايماقتاعى ەگٸستٸك القاپتىڭ 1 مىڭ 800 گەكتارى تامشىلاتىپ سۋارۋ جٷيەسٸنە كٶشكەن. ال, جىلىجاي كٶلەمٸ 1 مىڭ 285 گەكتارعا جەتٸپ وتىر. سوىنمەن قاتار شارۋلارا مەملەكەتتٸڭ اۋىل شارۋاشىلىعى سالاسىنداعى قارجىلاي قولداۋىن تسيفرلاندىرۋ ٸسٸمەن ۇشتاستىرعانىن دا ايتا كەتۋٸمٸز كەرەك. بۇل شارا فەرمەردٸڭ ۋاقىتىن پايدالانىپ, قاعازباستىلىقتان قۇتقارعانىن اتاپ ايتۋعا بولادى.
