مەملەكەت باسشىسى قاسىم-جومارت توقايەۆ سۋ باسقان ايماقتارعا جان-جاقتى قولداۋ كورسەتۋ، تەحنيكا، جۇمىس كۇشىن جىبەرۋ جونىندە تاپسىرما بەرگەن بولاتىن. وسى باعىتتا تۇركىستان وڭىرىندە اۋقىمدى جۇمىس ءجۇرىپ جاتىر. وبلىس اكىمى دارحان ساتىبالدىنىڭ تاپسىرماسىمەن جاۋاپتى باسقارمالار كەرەكتى تەحنيكالاردى ۇيلەستىرىپ، اتىراۋ وبلىسىنا 160-قا جۋىق تەحنيكا جولداندى.
اتالعان تەحنيكالار داربازا، تۇركىستان، مانكەنت، ارىس ستانسيالارىندا ۆاگوندارعا (پلاتفورما) تيەلىپ، اتىراۋ ستانسياسىنا «قتج» ۇك-نىڭ بەلگىلەنگەن كەستەگە سايكەس جەتكىزىلىپ جاتىر. تەحنيكالاردى ارتۋ جۇمىستارى 11 ساۋىردە جۇرگىزىلدى.
119 تەحنيكانى وبلىستاعى قۇرىلىس كومپانيالارى، «تۇران سۋ» مەكەمەسى ۇسىندى. كاسىپكەرلەر وسى ارەكەتى ارقىلى اتىراۋ حالقىنا قولداۋ كورسەتتى.
سونىمەن بىرگە «قازاتومونەركاسىپ» كومپانياسى، «قازاۆتوجول» مەكەمەسى اتىنان دا اۋىر كولىكتەر جىبەرىلدى. ارنايى جۇك ارتقىش جانە جۇك تاسىمالدايتىن، جەر قازاتىن كولىكتەر جانە وزگە دە تەحنيكالار سۋ شايعان اۋماقتاردى تازالاۋعا جانە بوگەتتەر سالۋعا قولدانىلماق.
ايتا كەتەيىك، تۇركىستان وبلىسىنان سۋ باسقان وڭىرلەرگە 600 تونناعا جۋىق گۋمانيتارلىق كومەك جىبەرىلدى. ەل جاناشىرلىقپەن ۇلەس قوسۋدا. سونداي-اق 150-دەن استام كاسىبي قۇتقارۋشى مەن توتەنشە جاعداي قىزمەتكەرلەرى اپات ايماعىندا جۇمىس ىستەپ جاتىر.
