ءدۇبىرلى سىندى قازاقستان رەسپۋبليكاسىنىڭ ءبىلىم جانە عىلىم مينيسترلىگى ۇيىمداستىرعان بولاتىن. ءتورت ايدان استام ۋاقىتقا سوزىلعان سىندا تۇركىستان وبلىسىنىڭ سپورتشىلارى جالپىكوماندالىق ەسەپتە ءبىرىنشى ورىندى جەڭىپ الدى.
تۇركىستاننىڭ تالانتتى ورەندەرى 20 التىن، 6 كۇمىس جانە 6 قولا مەدال ەنشىلەدى. ەكىنشى ورىندى الماتى قالاسىنىڭ سپورتشىلارى جەڭىپ السا، ۇزدىك ۇشتىكتى قىزىلوردا قۇراماسى تۇيىندەدى. جەڭىمپاز كومانداعا كۋبوكتى قازاقستان رەسپۋبليكاسىنىڭ ءبىلىم جانە عىلىم مينيسترلىگىنە قاراستى «ۇلتتىق عىلىمي - پراكتيكالىق دەنە تاربيەسى ورتالىعىنىڭ» ديرەكتورى سادىق مۇستافايەۆ تاپسىرىپ، جاڭادان قۇرىلعان تۇركىستان وبلىسىنىڭ بۇل جەتىستىگىن تاريحي جەڭىس دەپ باعالادى.
سپورتشىلاردى سپارتاكياداعا وبلىستىق ءبىلىم باسقارماسىنا قاراستى ادىستەمەلىك ورتالىق پەن دەنەشىنىقتىرۋ جانە سپورت باسقارماسى بىرلەسىپ دايىندادى. بىلىكتى باپكەرلەردىڭ ەڭبەگى ەش كەتپەي، تۇركىستاندىق جاستار رەسپۋبليكادا تەڭدەسسىز ەكەندەرىن دالەلدەدى. ەكى جىلدا ءبىر كەلەتىن سپارتاكيادادا توپ جارعان سپورتشىلار ەندى حالىقارالىق سايىستارعا دايىندالادى.
تۇركىستان وبلىسى اكىمىنىڭ باسپا ءسوز قىزمەتى
