«قازاقستان رەسپۋبليكاسىنداعى مەرەكەلەر تۋرالى» زاڭىنا سايكەس، جىل سايىن ەلىمىزدە ماۋسىم ايىنىڭ ەكىنشى جەكسەنبىسىندە «مالشىلار كۇنى» كاسىبي مەرەكەسى اتاپ وتىلەدى. تۇركىستان وبلىسىنىڭ مال شارۋاشىلىعى سالاسى ەلىمىزدە جەتەكشى ورىندا. مەملەكەتتىك قولداۋ مەن اتقارىلىپ جاتقان جۇمىستاردىڭ ناتيجەسىندە مال شارۋاشىلىعى قارقىندى دامۋ جولىنا ءتۇستى.
وتكەن جىلى مال شارۋاشىلىعى ءونىمى 470 ملرد. تەڭگەنى قۇراپ، ۇلەسى رەسپۋبليكادا 1 ورىننعا شىقتى نەمەسە 11 % قۇرادى. ەلىمىزدەگى ءىرى قارا مال سانىنىڭ 13 پايىزى، قويدىڭ 22 پايىزى، جىلقىنىڭ 11 پايىزى، تۇيەنىڭ 15 پايىزى، وندىرىلگەن ەتتىڭ 13 پايىزى، ءسۇتتىڭ 16 پايىزى ءوڭىردىڭ ۇلەسىندە.
وبلىستاعى قوي باسىنىڭ 14 %، ءىقم، جىلقىنىڭ 5 %، تۇيەنىڭ 7 % اسىل تۇقىمدى. 2024 جىلدىڭ 4 ايىندا ءىرى قارا مال سانى 1 ملن. 232،5 مىڭ باس، قوي مەن ەشكى 5 ملن. 502،4 مىڭ باس، جىلقى 484،8 مىڭ باس، تۇيە 44،5 مىڭ باس، قۇس 2 ملن. 085،5 مىڭ باستى قۇرادى. 78،4 مىڭ توننا ەت، 235،33 مىڭ توننا ءسۇت، 78،3 ملن. دانا جۇمىرتقا ءوندىرىلدى.
ەت ەكسپورتى بويىنشا تۇركىستان وبلىسى رەسپۋبليكادا كوش باسىندا. ەكسپورتقا شىعارىلاتىن ءىرى قارا مال ەتىنىڭ 80%، ۇساق مال ەتىنىڭ 75% وبلىستىڭ ەنشىسىندە (2023 جىلى 10،9 مىڭ توننا ءىقم، 5 مىڭ توننا قوي ەتى ەكسپورتالدى.
مال شارۋاشىلىعى ونىمدەرىنىڭ ەكسپورتتىق كولەمىن ۇلعايتۋدا وڭىردە بورداقىلاۋ الاڭدارى مەن كەشەندەرىن جۇيەلى دامىتۋ ءىسى وڭ سەپتىگىن تيگىزۋدە. وبلىستا جالپى 9183 ءىرى قارا مال بورداقىلاۋ الاڭى بار. ونىڭ ىشىندە، 400 باسقا دەيىن 9148 بىرلىك، 400 باستان 1000 باسقا دەيىن 13 بىرلىك، 1000 باستان جوعارى 22 مال بورداقىلاۋ الاڭى جۇمىس ىستەپ تۇر.
وبلىستا مال شارۋاشىلىعى ونىمدەرىن قايتا وڭدەۋدە 7 ەت ونىمدەرىن وڭدەۋ (24،6 مىڭ توننا)، 23 ءسۇت ونىمدەرىن وڭدەۋ (143،2 مىڭ توننا) كاسىپورىندارى جۇمىس ىستەيدى. وسى كاسىپورىندار ەسەبىنەن وبلىستا وندىرىلگەن ەتتىڭ 29،0 %، ءسۇتتىڭ 21،5 % قايتا وڭدەلىپ، نارىققا شىعارىلۋدا.
اتاپ ايتقاندا، «قارقىن-2030» ءجشس-نىڭ «Narlen» ماركاسىمەن شۇجىق، جۇمىرتقا ونىمدەرى، «ايكان» ءجشس-نىڭ «ەمير» ماركاسىمەن ءسۇت ونىمدەرى، «بورتە ميلكا» ءجشس-نىڭ «بورتە ميلكا» ماركاسىمەن ءسۇت ونىمدەرى قازاقستان نارىعىندا جوعارى سۇرانىسقا يە بولىپ، برەندتكە اينالا ءبىلدى.
ءسۇت ونىمدەرىن وڭدەۋ كاسىپورىندارىنىڭ قۋاتتىلىعىن ارتتىرۋ بويىنشا جالپى قۇنى 10،5 ملرد. تەڭگەنى قۇرايتىن 3 ءىرى تاۋارلى ءسۇت فەرمالارى ينۆەستيسيالىق جوبالارى جۇزەگە اسىرىلۋدا. بۇل جوبالاردى قولداۋعا رەسپۋبليكالىق بيۋدجەتتەن جىلدىق 2،5 % مولشەرلەمەمەن 6،0 ملرد. تەڭگە قارجى ءبولىندى. ولار: «بنك اگرو KZ» ج ش س، «بورتە ميلكا» ج ش س، «Sultan Agro» ج ش س.
جوبالار تۇركيالىق «Sezer»، شۆەسيالىق «De-Ieval» اۆتوماتتى تەحنولوگيالىق قوندىرعىلارىمەن جابدىقتالادى. دانيا، ۆەنگريا مەملەكەتتەرىنەن ونىمدىلىگى جوعارى گولشتين تۇقىمدى 1600 باس جانە سيممەنتال تۇقىمدى 600 باس انالىق ءىرى قارا مال اكەلىنەدى. وسى جوبالار ارقىلى جىلىنى قوسىمشا 10،4 مىڭ توننا ءسۇت ءونىمى وندىرىلەدى.
تۇركىستان وبلىسى اكىمىنىڭ باسپا ءسوز قىزمەتى
