وبلىس ورتالىعى تۇركىستان قالاسىنىڭ تاشكەنت شاھارىمەن ساۋدا-ەكونوميكالىق، تۋريستىك قاتىناستارىن نىعايتۋ ماقساتىندا «تۇركىستان-تاشكەنت» حالىقارالىق اۆتوبۋس باعىتى اشىلدى.

حالىقارالىق ىنتىماقتاستىقتى نىعايتۋعا باعىتتالعان وبلىس اكىمدىگىنىڭ ۇسىنىسى ءتيىستى مينيسترلىككە جولدانىپ، ناتيجەسىندە اعىمداعى جىلدىڭ 10 جەلتوقسانىندا تۇركىستان قالاسىنداعى «التىن وردا» اۆتوبەكەتىندە اتالعان باعىتتىڭ اشىلۋ ءراسىمى ءوتتى.

ايتۋلى شاراعا وبلىستىق جولاۋشىلار كولىگى جانە اۆتوموبيل جولدارى باسقارماسى باسشىسىنىڭ مىندەتىن اتقارۋشى م.مىرزابايەۆ، وبلىستىق تۋريزم جانە سىرتقى بايلانىستار باسقارماسى باسشىسىنىڭ ورىنباسارى ج.تولەبەكوۆ، وبلىستىق ءماسليحات دەپۋتاتى ب.مۇسابەكوۆ، سونداي-اق «باقداۋلەت سەرۆيس» ءجشس-نىڭ ديرەكتورى ن.قارابايەۆ، «التىن وردا» اۆتوبەكەتى ديرەكتورىنىڭ مىندەتىن اتقارۋشى ب.اجەكوۆ جانە ب ا ق وكىلدەرى قاتىستى.

اتالعان باعىتقا پاريتەتتىك نەگىزدە قازاقستاندىق تاسىمالداۋشى «باقداۋلەت سەرۆيس» ج ش س جانە وزبەكستاندىق «ۋزاۆتوترانس» ووو مەكەمەسى قىزمەت كورسەتەدى. ايتا كەتەرلىگى، باعىتتىڭ جالپى  قاشىقتىعى– 335 شاقىرىم. جولعا كەتەتىن ۋاقىت – 6 ساعات 40 مينۋت. ەكى باعىتتا كۇندەلىكتى 2 اۆتوبۋس قاتىنايدى.  تۇركىستان قالاسىنان شىعۋ ۋاقىتى («التىن وردا» اۆتوبەكەتى) ساعات 07:00 جانە 17:00-دە. ال تاشكەنت قالاسىنان شىعۋ ۋاقىتى («تاشكەنت» اۆتوۆوكزالى) – ساعات 08:00، 18:00 (استانا ۋاقىتىمەن). تەحنيكالىق ايالداما – 30 مينۋت. جول ءجۇرۋ ءتاريفى– 2000 تەڭگە نەمەسە 50000 سۋم.

ءوز كەزەگىندە  «تۇركىستان-تاشكەنت» حالىقارالىق اۆتوبۋس باعىتىنىڭ اشىلۋى ەكى ەلدىڭ اراسىندا تۋريستەر اعىنىنىڭ ارتۋىنا، جاڭا تۋريستىك باعىتتار قالىپتاستىرۋعا جانە ىنتىماقتاستىقتىڭ نىعايۋىنا وڭ اسەرىن تيگىزەتىن بولادى.



تۇركىستان وبلىسى اكىمىنىڭ باسپا ءسوز قىزمەتى