تۇركىستان وبلىسىنىڭ اكىمى جانسەيىت تۇيمەبايەۆ تاتارستاننىڭ قازاقستانداعى وكىلەتتى ۋاكىلى دەنيس ۆالەيەۆ جانە قازاقستان رەسپۋبليكاسىنىڭ رەسەي فەدەراسياسىنداعى ساۋدا وكىلدىگى، ساۋدا وكىلىنىڭ ورىنباسارى ەركەن جاكاتايەۆپەن كەزدەستى.

تاتار ەلىنىڭ بەلدى كاسىپكەرلەر توبىن باستاپ كەلگەن ازاماتتارعا، الدىمەن، العىسىن بىلدىرگەن ءوڭىر باسشىسى باۋىرلاس ەلدەردى بايلانىستىراتىن تەرەڭ تاريحىمىز بەن تىلدەر ۇقساستىعى، سالت-داستۇرلەرىمىزدىڭ قازىرگى ىنتىماقتاستىعىمىز ءۇشىن بەرىك نەگىز بولاتىنىن جەتكىزدى. تۇركىستاننىڭ جاڭارىپ، جاڭعىرىپ جاتقان تۇسىندا اعايىن تاتار جۇرتىمەن ونەركاسىپ، ساۋدا-ەكونوميكالىق، ينۆەستيسيالىق، سونىمەن بىرگە، تۇرعىن ۇي-كوممۋنالدى شارۋاشىلىعى، تۋريزم، ترانسپورت جانە قاۋىپسىزدىك سالالارىنا IT-تەحنولوگيا جۇيەلەرىن ەنگىزۋدە ارىپتەستىك ورناتۋعا ىنتالى ەكەنىن مەڭزەدى. سونداي-اق، تۇركىستان مەن تاتارستان استاناسى قازان قالاسىن باۋىرلاس قالالارعا اينالدىرۋ ۇسىنىسىن جەتكىزدى.

ءوز كەزەگىندە، تاتارستاننىڭ قازاقستانداعى وكىلەتتى ۋاكىلى د.ۆالەيەۆ تۇركىستان وبلىسىمەن كوپتەگەن سالالاردا ىنتىماقتاستىق ورناتۋعا دايىن ەكەنىن جەتكىزىپ، باۋىرلاس ۇلتتاردىڭ رۋحاني بايلانىسى دا بەكي تۇسەتىنىنە سەنىم ءبىلدىردى.

ەكى جاقتى وتىرىس ناتيجەسىندە، تۇركىستان وبلىسىنىڭ اكىمدىگى مەن تاتارستاننىڭ «بارس گرۋپ» اق اراسىندا يننوۆاسيالىق اقپاراتتىق تەحنولوگيالار جانە سيفرلاندىرۋ سالاسىندا ىنتىماقتاستىق مەموراندۋمى ءتۇزىلدى. اتالعان قۇجات اياسىندا ەلەكتروندى مەملەكەتتىك قىزمەت كورسەتۋدە يننوۆاسيالىق اقپاراتتىق تەحنولوگيالاردى دامىتۋ ماسەلەلەرى سىندى جايتتەر قامتىلعان.

ايتا كەتكەن ءجون، 2017 جىلى قازاقستان مەن تاتارستان اراسىنداعى ساۋدا اينالىمى 700 ملن. اقش دوللارىن قۇراپ، 2016 جىلمەن سالىستىرعاندا 1،7 ەسەگە وسكەن. بۇگىندە قوس ەلدىڭ كاسىپكەرلەرى ماشينا قۇراستىرۋ، مۇنايحيميا، اسكەري-تەحنيكالىق، كولىك-لوگيستيكالىق سالالارى اياسىندا ارىپتەستىك ورناتىپ كەلەدى. ەلوردالارى - استانا مەن قازان قالالارى باۋىرلاس شاھارلارى بولىپ تابىلسا، الماتى مەن قازان ارىپتەس قالالار سانالادى.



تۇركىستان وبلىسى اكىمىنىڭ باسپا ءسوز قىزمەتى