ەلباسىنىڭ تاپسىرماسىنا سايكەس، وبلىستاعى نارىق سۋبەكتىلەرىنىڭ 59 قىزمەت ءتۇرى بويىنشا تاريفتەرى تومەندەتىلدى. تومەندەتىلگەن تاريفتەر بيىلعى جىلدىڭ 1 قاڭتارىنان قولدانىسقا ەنگىزىلدى.
ناتيجەسىندە، حالىقتىڭ كوممۋنالدىق قىزمەتكە تولەيتىن قاراجاتىن ۇنەمدەۋ شامامەن 3،04 ملرد. تەڭگەنى قۇرايدى. وڭىرلىك كوممۋنيكاسيالار قىزمەتىندە وتكەن بريفينگتە وبلىستىق مونوپولياعا قارسى دەپارتامەنتى باسشىسىنىڭ ورىنباسارى قىمبات بەيسەنوۆ مالىمدەدى.
ەلەكتر ەنەرگياسىن تاسىمالداۋ ءتاريفى – 2019 جىلدىڭ 1 قاڭتارىنان باستاپ 10،2 پايىزعا، ياعني 7، 38 تەڭگەدەن 6،64 تەڭگەگە دەيىن ءتۇستى. تاسىمالداۋ جانە ءوندىرۋشى ستانسالاردىڭ تاريفتەرىنىڭ تومەندەۋى ەسەبىنەن تۇپكىلىكتى ءتاريفتىڭ تومەندەۋى 6،8 پايىزدى قۇرادى.
سونداي-اق، وسى ۋاقىتتان باستاپ تۇتىنۋشىلاردىڭ قوردالانعان قارىزى ءۇشىن ەلەكتر ەنەرگياسىنان قايتا قوسۋ تولەمى «وڭتۇستىك جارىق ترانزيت» جانە «ەنەرگوپوتوك» سەرىكتەستەرىمەن – 40 پايىزعا دەيىن تومەندەتىلگەن.
اعىمداعى جىلدىڭ 1 قاڭتارىنان وبلىستىڭ ىشكى جۇيەلەرمەن گازدى تاسىمالداۋعا بەكىتىلگەن «قازترانسگازايماق» اق ءتاريفى 12،7 پايىزعا تومەندەتىلەدى.
ناتيجەسىندە تاسىمالداۋ جانە كوتەرمە باعا ءتۇسۋ ەسەبىنەن سوڭعى تۇتىنۋشىلار ءۇشىن گاز ءتاريفى 5،8 پايىز ءتۇسىرىلىپ، جەكە تۇلعالار – 32،47 تەڭگە، ال حالىقتى جىلۋمەن قامتاماسىز ەتەتىن زاڭدى تۇلعالارعا – 28،27 تەڭگەنى قۇراماق.
وبلىستا ورتالىقتاندىرىلعان جىلۋمەن قامتاماسىز ەتەتىن 6 مەملەكەتتىك كوممۋنالدىق كاسىپورىن بار. كومىر وتىنىن قولدانا وتىرىپ جىلۋ ەنەرگياسىن شىعاراتىن مەكەمەلەر ءتاريفىن 1،4-24 پايىز ارالىعىندا ءتۇسىرىپ وتىر.
سونىمەن قاتار، وتكەن جىلدىڭ قازان ايىنان باستاپ «قازپوشتا» اكسيونەرلىك قوعامى (بۇدان ءارى – قوعام) تاراپىنان كوممۋنالدىق قىزمەتتەرگە ارنالعان تولەم تۇبىرتەك بلانكىلەرىن وڭدەگەنى ءۇشىن تۇتىنۋشىلاردان 150 تەڭگە مولشەرىندە كوميسسيالىق تولەم الىناتىندىعى انىقتالدى.
بۇگىندە اتالعان كوميسسيالىق تولەمنىڭ مولشەرىن ازايتۋ ماقساتىندا، دەپارتامەنتپەن ءتيىستى جۇمىستار جۇرگىزىلدى. سونىڭ ناتيجەسىندە، كوممۋنالدىق قىزمەتتەرگە ارنالعان تولەم تۇبىرتەك بلانكىلەرىن وڭدەگەنى ءۇشىن، تۇتىنۋشىلاردان 150 تەڭگە مولشەرىندە الىناتىن كوميسسيالىق تولەم، جەكە تۇلعالار ءۇشىن – 50 تەڭگەگە تومەندەتىلىپ، زەينەتكەرلەر، مۇگەدەك جاندار جانە ۇوس ارداگەرلەرى مەن تەڭەستىرىلگەندەر ءۇشىن – تەگىن بولدى.
